19-កក្តដា-2021 - ម៉ោង 02:34:PM
ភ្នំពេញ៖ ក្រុមការងារអន្តរាគមន៍បង្ក្រាបបទល្មើស ចលនាសត្វ នៃអគ្គនាយកដ្ឋាន សុខភាពសត្វនិងផលិតកម្មសត្វ ក្រសួងកសិកម្ម កាលពីវេលាម៉ោង ១០៖៣០នាទី ថ្ងៃទី ១៧ ខែកក្កដា ឆ្នាំ២០២១ បានស្ទាក់ឃាត់រថយន្តមួយគ្រឿង ដែលដឹកសត្វជ្រូក រស់ចំនួន ៦០ក្បាល នៅចំណុចផ្លូវជាតិលេខ២ សង្កាត់ចាក់អង្រែក្រោម ខណ្ឌមានជ័យ ដែលពុំមាន វិញ្ញាបនបត្របញ្ជាក់សុខភាពសត្វពីការិយាល័យផលិតកម្មនិងបសុព្យាបាលនៃមន្ទីរកសិកម្ម នោះទេ ។
តាមប្រភពព័ត៌មាន ពី មន្ត្រីជំនាញ ថ្លែងប្រាប់ក្រុមសារព័ត៌មាន នៅថ្ងៃទី១៩ ខែកក្កដា ឆ្នាំ២០២១ នេះ បានឲ្យដឹងថា រថយន្តមួយគ្រឿងនេះ SSANG YONG ISTANA ពណ៌ស ពាក់ស្លាកលេខភ្នំពេញ 2Z-5394 ចេញដំណើរមកពីផ្សារប៉័ងសី ភូមិស្វាយទង ឃុំខ្វាវ ស្រុកសំរោង ខេត្តតាកែវ ឆ្ពោះមករាជធានីភ្នំពេញ ហើយក៏ត្រូវមន្ត្រីជំនាញឃាត់ តែម្តង ។
បច្ចុប្បន្នក្រុមការងារ បានបញ្ជូនវត្ថុតាងបទល្មើសខាងលើនេះ ទៅរក្សាទុកនៅទីតាំង ចត្តាឡីស័កសត្វរបស់អគ្គនាយកដ្ឋានសុខភាពសត្វ ដើម្បីចាត់ការបន្តតាមនីតិវិធី ៕
