21-មេសា-2022 - ម៉ោង 04:12:PM
អន្តរជាតិ៖ តាមការចេញផ្សាយដោយ ទីភ្នាក់ងារសារព័ត៌មាន Al Jazeera នៅថ្ងៃព្រហស្បតិ៍ ទី២១ ខែមេសា ឆ្នាំ២០២២ ដោយយោងតាមសម្តីអភិបាលតំបន់ លូហាន់ក៍ (Lunhansk) លោក សឺហី ហៃដៃ (Serhiy Haidai) បាននិយាយថា កម្លាំងទ័ពរុស្ស៊ី ឥឡូវនេះ បានវាយដណ្ដើមគ្រប់គ្រងបាន ៨០ភាគរយនៃតំបន់នេះហើយ ដែលជាតំបន់មួយក្នុងចំណោមតំបន់ចំនួនពីរ ដែលបង្កើតបានជាតំបន់ ដុនបាស់ (Donbas) ដែលស្ថិតនៅភាគខាងកើតប្រទេសអ៊ុយក្រែន។
គោលដៅមួយរបស់រុស្ស៊ី គឺពង្រីកទឹកដីនៅក្នុងតំបន់ Donbas ដែលស្ថិតក្រោមការគ្រប់គ្រងរបស់ក្រុមផ្តាច់ខ្លួន ដែលគាំទ្រដោយរុស្ស៉ី។ មុនពេលរុស្ស៊ីឈ្លានពានអ៊ុយក្រែនកាលពីថ្ងៃទី២៤ ខែកុម្ភៈកន្លងទៅនេះ រដ្ឋាភិបាលទីក្រុងកៀវគ្រប់គ្រង ៦០ភាគរយនៃតំបន់ Luhansk។
លោក Haidai បានបញ្ជាក់ថា កងកម្លាំងរុស្ស៊ី បានចាប់ផ្តើមបន្តការវាយប្រហាររបស់ពួកគេ នាសប្តាហ៍នេះនៅភាគខាងកើត និងភាគខាងត្បូងប្រទេសអ៊ុយក្រែន បានពង្រឹងការវាយប្រហាររបស់ពួកគេបន្ថែមទៀត នៅក្នុងតំបន់ Luhansk។
បន្ទាប់ពីវាយដណ្តើមគ្រប់គ្រងបានទីក្រុង ក្រេមីនណា (Kreminna) ទាំងស្រុង លោកអភិបាលតំបន់ Lunhansk បានបន្ថែមថា កងកម្លាំងរុស្ស៊ី នាពេលឥឡូវនេះកំពុងគំរាមកំហែងលើទីក្រុង រូប៊ីហ្សណេ (Rubizhne) និង ប៉ូប៉ាស្នា (Popasna) ទៀត ហើយលោកបានចេញសេចក្ដីណែនាំ ជំរុញឱ្យប្រជាជនទាំងអស់ជម្លៀសខ្លួនចេញជាបន្ទាន់ផងដែរ៕
