08-កក្តដា-2025 - ម៉ោង 02:51:PM
ភ្នំពេញ៖ កម្លាំងជំនាញនៃអគ្គនាយកដ្ឋានសុខភាពសត្វ និងផលិតកម្មសត្វ បានឆ្មក់ស្ទាក់ចាប់សាច់បង្កកលួចនាំចូលពីប្រទេសវៀតណាមដោយខុសច្បាប់តាមច្រករបៀងស្រុកកោះធំ ជាង៨តោន ចូលមករាជធានីភ្នំពេញ ដើម្បីលក់ចែកចាយបន្ត។
ក្នុងសកម្មភាពប្រតិបត្តិការនេះធ្វើឡើងកាលពីរវេលាម៉ោង០៣ រសៀលថ្ងៃទី០៦ ខែកក្កដា ឆ្នាំ២០២៥ នៅលើកំណាត់ផ្លូវ ៣០ម៉ែត្រ សង្កាត់ព្រៃស ខណ្ឌ ដង្កោ រាជធានីភ្នំពេញ។
នេះបើតាម លោក ហ៊ុន សារ៉ាត់ អគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វ បានឲ្យដឹងថា ប្រតិបត្តិការនេះ បានធ្វើការឃាត់ចាប់រថយន្ត ១គ្រឿង ម៉ាកHYUNDIA ដឹកសាច់សត្វបង្កកចំនួន ៥០២កេស ស្មើនឹង ៨០១៥គីឡូក្រាម ដែលបានដឹកតាមច្រករបៀងស្រុកកោះធំ ចូលមកភ្នំពេញដើម្បីលក់ចែកចាយបន្ត។
លោកបានឲ្យដឹង ពីរចម្លើយឆ្លើយសារភាពរបស់អ្នកបើកបររថយន្ត ដឹកសាច់បង្កកខាងលើថា ការដឹកនេះ ពុំមានលិខិតអនុញ្ញាតអ្វីទាំងអស់ ក្នុងនោះមានសាច់បង្កករួមមាន ភ្លៅមាន់ និងសាច់គោ ដែលខ្លួនលួចដឹកចេញពីប្រទេសវៀតណាម តាមច្រករបៀង ស្រុកកោះធំ ខេត្តកណ្ដាល ឆ្ពោះមកលក់ចែកចាយនៅរាជធានីភ្នំពេញ។
ក្រោយឃាត់ឆែកត្រួតពិនិត្យរួច កម្លាំងជំនាញបានឃាត់ និងនាំយកវត្ថុតាងបទល្មើសខាងលើ ទៅរក្សារទុកនៅទីតាំងចត្តាឡីស័កសត្វរបស់អគ្គនាយកដ្ឋានសុខភាពសត្វ និងផលិតកម្មសត្វ ដើម្បីអនុវត្តន៍តាមនីតិវិធីច្បាប់ឲ្យបានម៉ឹងម៉ាត់បំផុត ។
ជាមួយគ្នានោះមហាជន បានដាក់ការងឿងឆ្ងល់ថា ក្រែងនៅតាមច្រករបៀងព្រំដែនកោះធំ នឹងច្រកផ្សេងៗរបស់ខេត្តកណ្តាលជាមួយប្រទេសវៀតណាមនោះ មានស្នាក់ការគោលដៅត្រួតពិនិត្យរបស់គយខេត្តកណ្តាលយ៉ាងតឹងរឹងណាស់ ពិសេសតាមដងផ្លូវមានស្នាក់ត្រួតពិនិត្យ ឃើញថាមានស្ទើគ្រប់កន្លែងឆ្ពោះមកកាន់ខេត្ត គឺចង់និយាយថា សូម្បីតែស្រមោច១ក៏មិនឲ្យរួចផង ចុះហេតុអ្វីបានជាអាចរបូតពីភ្នែកអស់លោកមន្ត្រីគយប្រចាំការទាំងនោះបាន រហូតធ្វើដំណើយតាមទ្បានប៉ុនភ្នំ បានយ៉ាងរលូនមកដល់ក្រុងភ្នំពេញ តែជាអកុសលក៏ត្រូវបានមន្ត្រីជំនាញនៃអគ្គនាយកដ្ឋានសុខភាពសត្វ និងផលិតកម្មសត្វចាប់បាន នូវសាច់បង្កកជាង៨តោននេះ ដែលបានលួចនាំចូលពីប្រទេសវៀតណាមខុសច្បាប់?ឬមួយក៏មានការបើកភ្លើងខៀវពីលោក សំ កុសល ប្រធានសាខាគយខេត្តកណ្ដាល ទេដឹង?បានជាឈ្មួញអាចដឹកសាច់បង្កកទាំងតោនចូលមកដល់ក្រុងភ្នំពេញបានយ៉ាងរំភើយបែបនេះ? ចុះបើសាច់បង្កកទាំងនោះខូចគុណភាពវិញ ?តើលោកមេគយ មានបានគិតពីផលប៉ះពាល់ដល់បញ្ហាសុខភាពបងប្អូនប្រជាពលរដ្ឋទេ ?ឬមួយលោកគិតថា ឲ្យតែអាញ់បានលុយចង់អ្នកណាងាប់អីក៏ងាប់ទៅមែនឬ?
ជុំវិញករណីខាងលើនេះសូមឲ្យលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ក៏ដូចជាលោក គុណ ញឹម អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា លោកទាំង២កុំបណ្ដែតបណ្ដោយឲ្យលោក សំ កុសលប្រធានសាខាគយខេត្តកណ្ដាល ធ្វើអ្វីៗតាមអំពើចិត្តបែបនេះ ព្រោះថារាជរដ្ឋាភិបាលដំណាក់កាលទី៧ ដែលដឹកនាំដោយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា លោកបានខិតខំប្រឹងប្រែងណាស់ ក្នុងការគៀងគរវិនិយោគពីគ្រប់ទិសទីទាំងក្នុងស្រុកនិងក្រៅស្រុក ធ្វើយ៉ាងណាឲ្យសេដ្ឋកិច្ចរបស់ជាតិ ជីវភាពប្រជាជន និងប្រទេសទាំងមូលមានការីចចម្រើនជឿនលឿន ស្មើមុខស្មើមាត់លើឆាកអន្តរជាតិ កុំព្រោះតែបុគ្គលម្នាក់ធ្វើឲ្យរាំងស្ទះដល់ដំណើរការកសាងសេដ្ឋកិច្ចជាតិ ។
ចំពោះករណីខាងលើនេះ ក៏សូមស្នើដល់អង្គភាពប្រឆាំងអំពើពុករលួយ “ACU’’មេត្តាលោកចុះពិនិត្យតាមដានស្រាវជ្រាវ ស៊ើបអង្គេត និងចាត់វិធានការលើករណីនេះឲ្យបានតឹងរឹងបំផុតកុំឲ្យជនឆ្លៀតឱកាសធ្វើអ្វីបានតាមតែអំពើចិត្តបែបនេះតទៅទៀត៕
