អភិបាលខេត្តតាកែវ ណែនាំដល់អាជ្ញាធរមូលដ្ឋានបង្កើនសកម្មភាពផ្សព្វផ្សាយអំពីគ្រោះថ្នាក់គ្រឿងញៀនដល់ប្រជាពលរដ្ឋ

08-សីហា-2023 - ម៉ោង 01:42:PM

តាកែវ៖ ថ្លែងក្នុងឱកាសអញ្ជើញចូលរួមក្នុងពិធីអបអរសាទរទិវាអន្តរជាតិប្រយុទ្ធប្រឆាំងគ្រឿងញៀន ក្រោមប្រធានបទ ប្រជាជនជាចម្បង បញ្ឈប់ការរើសអើង និងការមាក់ងាយអ្នកញៀនគ្រឿងញៀន ពង្រឹងការងារ អប់រំបង្ការ ពីបញ្ហាគ្រឿងញៀន នាព្រឹកថ្ងៃអង្គារ៍ ទី០៨ ខែសីហា ឆ្នាំ២០២៣នេះ នៅសាលប្រជុំរដ្ឋបាលសាលាខេត្តតាកែវ ឯកឧត្តម អ៊ូច ភា អភិបាលខេត្តតាកែវ បានធ្វើការណែនាំដល់អាជ្ញាធរមូលដ្ឋានស្រុកឃុំសង្កាត់ ប្អូនៗសិស្សានុសិស្ស យុវជន ត្រូវបង្កើនសកម្មភាព អប់រំផ្សព្វផ្សាយដល់គ្រប់ស្រទាប់មហាជន ពិសេសប្អូនៗត្រូវចៀសអោយឆ្ងាយពីគ្រឿងញៀន ដែលវាធ្វើអោយប៉ះពាល់សុខភាពខ្លួនឯង គ្រួសារ និងសង្គមជាតិ។

ឯកឧត្តមអភិបាលខេត្ត បានមានប្រសាសន៍ថាបញ្ហាគ្រឿងញៀនជាបញ្ហាសង្គមមួយដ៏រ៉ាំរៃ និងស្មុគស្មាញដែលវា បង្ករផលវិបាកជាច្រើនដល់សង្គមជាតិ រួមនិងមនុស្សទូទៅ។ ហើយការដោះស្រាយបញ្ហាគ្រឿងញៀននេះ ទាមទារអោយមានការចូលរួមចាប់ពីបុគ្គលម្នាក់ៗ ក្រុមគ្រួសារ សហគមន៍ អាជ្ញាធរមូលដ្ឋាន  អង្គការជាតិ អន្តរជាតិ ជាដើមដើម្បីធ្វើយ៉ាងណាឈានទៅរកការលុបបំបាត់ការប្រើប្រាស់គ្រឿងញៀននៅតាមមូលដ្ឋាន។

អភិបាលខេត្តតាកែវ ឯកឧត្តម អ៊ូច ភា បានមានប្រសាសន៍បន្តថាគ្រឿងញៀន វាបំផ្លាញទាំងរូបរាង្គកាយ សុខភាព បញ្ញាស្មារតី និងអាចឈានដល់ការស្លាប់ទៀតផង ដូច្នេះក្នុងនាមប្អូនៗជាសិស្សានុសិស្ស និងជាទំពាំងស្នងឫស្សីជំនាន់ក្រោយ ត្រូវឆ្លើយថាទេចំពោះគ្រឿងញៀន កុំចង់សាក ចង់ដឹងអោយសោះ ពោលធ្វើយ៉ាងណារួមគ្នា ទប់ស្កាត់ ការជួញដូរ ចែកចាយ និងប្រើប្រាស់គ្រឿងញៀនគ្រប់ប្រភេទ ដើម្បីធានាបាននូវគោលនយោបាលភូមិឃុំមានសុវត្ថិភាពទាំង៩ចំណុចដែលរាជរដ្ឋាភិបាលកម្ពុជាបានដាក់ចេញ គ្មានចោរលួចឆក់ប្លន់ អំពើហឹង្សា ក្មេងទំនើង គ្រឿងញៀន កើតមានឡើងនៅក្នុងមូលដ្ឋានតទៅទៀត ព្រោះបទល្មើសផ្សេងៗវាកើតឡើងពីយុវជនដែលប្រើប្រាស់គ្រឿងញៀន ។

បើតាមរបាយការណ៍លោក យង់ សុវឌ្ឍនា អភិបាលរងខេត្តតាកែវ និងជាប្រធានលេខាធិការដ្ឋានប្រយុទ្ធប្រឆាំងគ្រឿងញៀនខេត្តតាកែវ បានអោយដឹងថានៅក្នុងឆមាសទី១ ឆ្នាំ២០២៣នេះ ក្រុមការងារលេខាធិការដ្ឋានប្រយុទ្ធប្រឆាំងគ្រឿងញៀនខេត្ត បានចុះអប់រំផ្សព្វផ្សាយអំពីផលប៉ះពាល់នៃអ្នកប្រើប្រាស់គ្រឿងញៀន ច្បាប់ស្ដីពីការត្រួតពិនិត្យគ្រឿងញៀន ភូមិ-ឃុំមានសុវត្ថិភាព សម្រេចបាន៦៤៩ លើក និងបានចុះបង្រាបករណីដាំកញ្ឆាខុសច្បាប់មានចំនួន០៥លើក កាប់បំផ្លាញដើមកញ្ឆាស្រស់ចំនួន ១១,៤៦៧ដើម ស្មើរនឹង៤៤ទីតាំង និងអាងស្តុកទឹកចំនួន២៨ អាង លើផ្ទៃដី៦,៦២៨ម៉ែត្រការ៉េ និងបានសហការជាមួយមន្រ្តីមូលដ្ឋាន ភូមិ-ឃុំ ចុះបង្រាបបទល្មើសគ្រឿងញៀនបានចំនួន៧៣ ករណី ឃាត់ខ្លួនជនសង្ស័យចំនួន ១៨៧នាក់ ស្រី១២នាក់ និងអនុវត្តតាមដីកាចំនួន២៧ដីកា ជនសង្ស័យចំនួន ១៥នាក់ ស្រី០១ នាក់ ព្រមទាំងវត្ថុតាងផ្សេងៗមួយចំនួនទៀត ផងដែរ៕