28-កក្តដា-2023 - ម៉ោង 02:38:PM
តាកែវ ៖ លោក អ៊ូច ភា អភិបាល ខេត្តតាកែវ បានធ្វើការអំពាវនាវឲ្យអាជ្ញាធរមូលដ្ឋានគ្រប់លំដាប់ថ្នាក់ ពិសេសលោកអភិបាលក្រុងស្រុក ត្រូវបន្តបំផុសគំនិតបងប្អូនប្រជាពលរដ្ឋនឹងធ្វើសកម្មភាពក្នុងការដាំដើមឈើឱ្យកាន់តែច្រើនជាងមុននៅតាមទីសាធារណៈ ដីព្រៃរបស់រដ្ឋ វត្តអារមជាដើម ។
ថ្លែងនៅក្នុងឱកាសអញ្ជើញចូលរួមដាំដើមកូនឈើក្នុងពិធីរុក្ខទិវា ៩ កក្ដដា ដែលបានប្រារព្ធធ្វើឡើងនៅសហគមន៍ព្រៃឈើត្រពាំងធំខាងត្បូង ស្ថិតឃុំត្រពាំងធំខាងត្បូង ស្រុកត្រាំកក់ ខេត្តតាកែវ នាព្រឹកថ្ងៃសុក្រ ទី២៨ ខែ កក្កដា ឆ្នាំ២០២៣ លោក អ៊ូច ភា អភិបាលខេត្តបានបន្តថា សូមអាជ្ញាធរគ្រប់លំដាប់ថ្នាក់ ខិតខំដាំដើមឈើ នៅតាមទីធ្លារអគារ និងតាមដងផ្លូវសាធារណៈ ដីព្រៃរបស់រដ្ឋនានា ឲ្យបានច្រើនជាអតិបរមា ដើម្បីជាទីដ្ឋានមានម្លប់ត្រជាក់ ត្រឈឹងត្រឈៃ ដល់ប្រជាពលរដ្ឋយើង ហើយទន្ទឹមនឹងនេះ សហគមន៍មូលដ្ឋាន សូមចូលរួមគ្រប់គ្រងថែរក្សាការពារ និងដាំដុះព្រៃឈើ ដែលអាចផ្ដល់ផលប្រយោជន៍យ៉ាងច្រើន ដើម្បីអភិវឌ្ឍសេដ្ឋកិច្ចសង្គម និងសម្រាប់ទ្រទ្រង់ ជីវភាពរបស់ប្រជាជន។
លោកអភិបាលខេត្តបានបន្តថា អាជ្ញាធមូលដ្ឋានក៏ត្រូវធ្វើចលនាឲ្យប្រជាជនកម្ពុជាយើងទាំងអស់គ្នា ត្រូវចូលរួមដាំដើមឈើឡើងវិញនៅគ្រប់ទិសទី ដើម្បីបង្កើនធនធានព្រៃឈើ ក្នុងការរក្សានិយតភាពនៃប្រភពទឹក សម្រួលធាតុអាកាសឲ្យមានប្រក្រតីភាព អនុគ្រោះដល់ជីវិតរស់នៅរបស់មនុស្ស-សត្វ និងអំណោយផលដ៏ប្រសើរ ដល់ការដាំដុះដំណាំសព្វសារពើរបស់ប្រជាកសិករ។
លោក អ៊ូច ភា អភិបាលខេត្តតាកែវ បានគូសបញ្ជាក់ទៀតថា ពិធី"រុក្ខទិវា" គឺបានបដិសន្ធិឡើងនៅសម័យសង្គមរាស្ត្រនិយម ក្រោមព្រះរាជបូជនីយកិច្ចដឹកនាំដ៏ថ្លៃថ្លារបស់ ព្រះករុណាព្រះមហាវីរក្សត្រ ព្រះវរជាបិតាជាតិខ្មែរ ព្រះបរមរតនកោដ្ឋ ជាទីគោរពសក្ការៈដ៏ខ្ពង់ខ្ពស់បំផុត តាំងពីទសវត្សរ័៥០មក ដោយមានការចូលរួមយ៉ាងផុលផុសពីប្រជាពលរដ្ឋគ្រប់ស្រទាប់ ក្លាយទៅជាសកម្មភាពទូលំទូលាយក្នុងចលនាទិវាពលកម្មដាំដើមឈើនៅក្នុងសង្គម ដែលទីបំផុតត្រូវបានទទួលស្គាល់ជា ពិធីប្រពៃណីជាតិ មួយហៅថា ( ពិធីរុក្ខទិវា ) ។
បើតាមការឱ្យដឹងពី លោក ស៊ឹម ឡាបុ័ង នាយខណ្ឌរដ្ឋបាលព្រៃឈើតាកែវ ឆ្នាំ២០២៣នេះ ខណ្ឌរដ្ឋបាលព្រៃឈើ បានរៀបចំកូនឈើ ប្រភេទ ក្រញូង បេង ធ្នង់ សុក្រម និងឈើទាល ចំនួន ៤៣៣៧ដើម សម្រាប់ដាំនៅលើផ្ទៃដីទំហំ ២៦០២០ហិកតា នៅក្នុងសហគមន៍ព្រៃឈើត្រពាំងធំខាងត្បូងនេះ ដើម្បីបង្គើនគម្របបៃតងឡើងវិញ និងធ្វើឱ្យប្រសើរឡើង នូវសោភ័ណ្ឌភាព ទេសភាពធម្មជាតិ បរិស្ថាន និងជួយអោយបរិកាស ក្នុងការកាត់បន្ថយកំដៅភពផែនដី និងការប្រែប្រួលអាកាសធាតុ ពិសេសធ្វើឱ្យសហគមន៍ព្រៃឈើនេះ មានព្រៃឈើឡើងវិញ ៕