27-កក្តដា-2023 - ម៉ោង 03:22:PM
តាកែវ៖ មន្រ្តីជាន់ខ្ពស់ក្រសួងសង្គមកិច្ច បានគូសបញ្ជាក់ថា គិតចាប់ពីថ្ងៃចាប់ផ្តល់កម្មវិធីឧបត្ថម្ភសាច់ប្រាក់ជូនស្រ្តីមានផ្ទៃពោះ និងកុមារអារយុក្រោម២ឆ្នាំត្រឹមថ្ងៃទី១០ ខែកក្កដា ឆ្នាំ២០២៣នេះ បានចុះឈ្មោះអ្នកទទួលផលចំនួន ៣២៦.២៣០នាក់ ជាស្រ្តីចំនួន ២១១.៨៦៤នាក់ និងជាកុមារ ១១៤.៣៦៦នាក់ ដែលគិតជាទំហំទឹកប្រាក់ស្មើនឹង ២៤,៤៨៥,៦២៩.២៧ដុល្លារអាមេរិក ។
ថ្លែងនៅក្នុងឱកាសអញ្ជើញបើកវគ្គបណ្តុះបណ្តាលដំណើរការអនុវត្តកម្មវិធី និងអត្រាឧបត្ថម្ភថ្មីសម្រាប់កម្មវិធីឧបត្ថម្ភសាច់ប្រាក់ជូនស្រ្តីមានផ្ទៃពោះ និងកុមារអារយុក្រោម២ឆ្នាំ ជូនដល់អស់លោក លោកស្រីជាអភិបាលរងក្រុងស្រុក ប្រធានស្រុកប្រតិបត្តិ និងលោក លោកស្រី មេឃុំ ចៅសង្កាត់ និងមន្រ្តីអ្នកកម្មវិធីដែលអញ្ជើញមកពីទូទាំងខេត្ត នៅព្រឹកថ្ងៃព្រហស្បតិ៍ ទី២៧ ខែកក្កដា ឆ្នាំ២០២៣នេះ លោក ឈួរ សុបញ្ញា រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតសម្បទា បានមានប្រសាសន៍ថា ការរៀបចំបើកវគ្គបណ្តុះបណ្តាលនាពេលនេះ គឺផ្តោតសំខាន់លើកម្មវិធីឧបត្ថម្ភសាច់ប្រាក់ជូនស្រ្តីមានផ្ទៃពោះ និងកុមារអាយុក្រោម២ឆ្នាំហើយកម្មវិធីនេះត្រូវបានដាក់ឱ្យអនុវត្តនៅខែមិថុនាឆ្នាំ២០១៩ ហើយកម្មវិធីនេះគឺមានចរិតិអចិន្រ្តៃយ៍ និងមានគោលបំណងលើកកម្ពស់សុខុមាលភាពមាតា និងទារក ក្នុងការរួមចំណែកដោះស្រាយបញ្ហាកង្វះអាហារូបត្ថម្ភរបស់កុមារក្នុងគ្រួសារក្រីក្រ ចាប់តាំងពីកូនក្នុងផ្ទៃរហូតដល់អាយុ២ឆ្នាំ និងជំរុញការលូតលាស់ទាំងកាយសម្បទា និងបញ្ញាស្មារតី ។
លោក ឈួរ សុបញ្ញា បានបន្តទៀតថា ដើម្បីឆ្លើយតបទៅនឹងអនុសាសន៍ដ៏ខ្ពស់ខ្ពស់របស់សម្តេចតេជោ ហ៊ុន សែន កាលពីថ្ងៃទី២២ ខែឧសភា ឆ្នាំ២០២៣អំពីការតម្លើងអត្រាឧបត្ថម្ភថ្មីសម្រាប់កម្មវិធីឧបត្ថម្ភសាច់ប្រាក់ជូនស្រ្តីមានផ្ទៃពោះ និងកុមារអាយុក្រោម២ឆ្នាំ ដែលនឹងគ្រោងនឹងចាប់ផ្តើមអនុវត្តនៅថ្ងៃទី ០១ ខែសីហា ឆ្នាំ២០២៣ខាងមុខនេះ ហើយសម្រាប់កម្មវធីនេះ មិនត្រឹមតែផ្តល់នូវសាច់ប្រាក់នោះទេ ប៉ុន្តែវាជាផ្នែកមួយក្នុងការជំរុញលើកទឹកចិត្តដល់អ្នកទទួលផល ឱ្យទទួលយកសេវាសុខភាពរបស់មូលដ្ឋានសុខាភិបាលសាធារណៈជាជម្រើសតំបូង ។ រាជរដ្ឋាភិបាលបានគិតគូរជាប្រចាំក្នុងការបំពេញបាននូវភាពគ្រប់ជ្រុងជ្រោយផ្នែកជីវភាព និងកសាងបាននូវមូលធនមនុស្ស លុបបំបាត់ឱ្យបាននូវភាពក្រីក្រក្នុងសហគមន៍ និងសំដៅអភិវឌ្ឍឥតឈប់ឈរលើគ្រប់វិស័យ ។
បើតាមរបាយការណ៍របស់លោក សេន សុខគា ប្រធានមន្ទីរសង្គមកិច្ចអតីតយុទ្ធជន និងយុវនីតិសម្បទារខេត្ត បានគូសបញ្ជាក់ថា កម្មវិធីឧបត្ថម្ភសាច់ប្រាក់ជូនស្រ្តីមានផ្ទៃពោះ និងកុមារអារយុក្រោម២ឆ្នាំ ដោយគិតចាប់ពីថ្ងៃទី ០១ ខែកុម្ភៈ ឆ្នាំ២០២០ ដល់ថ្ងៃទី ១៩ ខែកក្កដា ឆ្នាំ២០២៣ ខេត្តតាកែវទទួលផលសរុបចំនួន ៨,៩៦០នាក់ ក្នុងនោះស្រ្តីមានផ្ទៃពោះចំនួន ៦,៤១៥នាក់ និងកុមារចំនួន ២,៥៤៥នាក់ គិតជាទឹកប្រាក់សរុបចំនួន ៣,៨៩៤,០៨០,០០០រៀល ប្រហែលជិត១លានដុល្លារសហរដ្ឋអាមេរិក ៕