27-គុម្ភះ-2023 - ម៉ោង 01:49:PM
តាកែវ៖ បាត់ដំណឹងឈឹងរហូតមកដល់ពេលនេះអស់រយ:ពេលជាង១ខែទៅហើយ ចំពោះករណីរឿងវាយសម្លាប់មនុស្ស១នាក់នៅស្រុកត្រាំកក់ តែសមត្ថកិច្ចក្នុងមូលដ្ឋានហាក់បីដូចជាមិនបានខ្នាក់ខ្នែងដើម្បីស្រាវជ្រាវ ចាប់ខ្លួនក្រុមជនដៃដល់យកមកផ្តន្ទាទោស ដើម្បីឲ្យក្រុមគ្រួសារជនរងគ្រោ:បានស្ងាប់ចិត្តឡើយ បើទោះបីបានដឹងថាមានជនសង្ស័យចំនួន៣នាក់មានជាប់ពាក់ពន្ធ័ក្នុងករណីនេះក៏ដោយ។
បើយោងតាមការបញ្ជាក់ពីរអាណាព្យាបាលជនរងគ្រោះ ក្នុងករណីឃាតកម្មនេះ ឲសារព័ត៌មានយើងដឹងនៅថ្ងៃទី២៦ ខែកុម្ភះ ឆ្នាំ២០២៣នេះថា គាត់បានសុំអោយសមត្ថកិច្ចជំនាញនៃស្នងការដ្ឋាននគរបាលខេត្តតាកែវ ពិសេសសមត្ថកិច្ចស្រុកត្រាំកក់ផ្ទាល់ សូមជួយរកយុត្តិធ័មអោយពួកគាត់ផង នឹងជួយពន្លឿនក្នុងការស្រាវជ្រាវរកមុខជនដៃដល់ យកមកផ្តន្ទាទោសតាមផ្លូវច្បាប់ ព្រោះរឿងនេះបានកើតឡើងជាង១ខែកន្លងទៅហើយ។
លោក សុខ សំអឿន អាយុ៦២ឆ្នាំ ដែលត្រូវជាជីតានៃសពជនរងគ្រោះ រស់នៅភូមិស្រង៉ែ ឃុំឧត្តមសូរិយា ស្រុកត្រាំកក់ ខេត្តតាកែវបានឲ្យដឹងថា ចៅប្រុសរបស់គាត់ឈ្មោះ គង់ ចំរើន អាយុ២០ឆ្នាំរស់នៅក្នុងបន្ទុក ត្រូវបានក្រុមជនដៃដល់ដែលមានគ្នា៣ទៅ៤នាក់ ព្រួតវាយសម្លាប់ដោយដុំថ្ម កាលពីរយប់ថ្ងៃទី២១ ខែមករា ឆ្នាំ២០២៣ វេលម៉ោង២រំលងអាធ្រាតុយប់ នៅលើផ្លូវជាតិលេខ៣ ខាងត្បូងស្ពានស្លាគូ ចន្លោះគីឡូម៉ែត្រលេខ៦៧ ក្នុងឃុំឧត្តមសូរិយា ស្រុកត្រាំកក់។
ដោយក្រោយពេលកើតហេតុ ប៉ូលីសប៉ុស្តិ៍រដ្ឋបាលឃុំ ក៏បានចុះធ្វើកំណត់ហេតុ ហើយគាត់ក៏បានដាក់ពាក្យបណ្តឹងទៅប៉ុស្តិ៍ ស្រាវជ្រាវដើម្បីចាប់ជនដៃដល់ យកមកផ្តន្ទាទោសផងដែរ តែហាក់បីដូចជាស្ងាត់ឈឹងដោយលោកមេប៉ុស្កិ៍រដ្ឋបាលឃុំមិនធ្វើ នឹងមានបំណងទុកចោលមិនចាត់ការឬស្រាវជ្រាវរកជនដៃដល់តែម្តង។ អាណាព្យាបាលជនរងគ្រោះបាននិយាយទាំងអស់សង្ឃឹមថា ជនដៃដល់មិនពិបាកស្រាវជ្រាវរកនោះទេ បើសិននគរបាលប៉ុស្កិ៍រដ្ឋបាលឃុំនឹងស្រុកត្រាំកក់ចង់ចាប់ខ្លួនជនដៃដល់ គឺចាប់ខ្លួនអ្នកដែលដឹកសពកូនឬចៅរបស់គាត់យកមកដល់ផ្ទះនោះគឺដឹងហើយមិនគួទុកចោលសំណុំរឿងឃាតកម្មនេះសោះ ព្រោះអូសបន្លាយពេលជាង១ខែទៅហើយ។
លោក គៀត ស៊ីណា មេប៉ុស្កិ៍រដ្ឋបាលឃុំឧត្តមសូរិយាស្រុកត្រាំកក់បានឲ្យដឹង នៅថ្ងៃទី២៧ ខែកុម្ភះ ឆ្នាំ២០២៣ តាមទូរស័ព្ទថា នៅពេលនេះលោកកំពុងប្រជុំនៅសាលាឃុំ។
ចំណែកឯលោកវរសេនីយ៍ឯក ឌុក ធីយ៉ា អធិការនគរបាលស្រុកត្រាំកក់ បានប្រាប់សារព៍ត៌មានយើង តាមទូរស័ព្ទឲ្យដឹងថា ករណីឃាតកម្មខាងលើនេះយើងកំពុងតែធ្វើការស្រាវជ្រាវដើម្បីចាប់ខ្លួនក្រុមជនដៃដល់ ដោយសាររឿងនេះបានកើតឡើងនៅម៉ោង២យប់រំលងអាធ្រាតុទៅហើយ មិត្តភក្កិរបស់ជនរងគ្រោះដែលដឹកសាកសពមកដល់ផ្ទះអោយឪពុក ម្តាយក្រុមគ្រួសារវានោះ យើងមានការសង្ស័យនឹងបានហៅមកសាសួចំនួន៣នាក់ដែរ តែវាមិនសារភាពហើយឆ្លើយថាមិនដឹង ទើបយើងដោះលែងវិញទៅ ដូច្នេះរឿងនេះយើងកំពុងតែធ្វើនឹងស្រាវជ្រាវដើម្បីចាប់ខ្លួនក្រុមជនដៃដល់ ដើម្បីយកមកផ្តន្ទាទោសអោយទាល់តែបាន ព្រោះយើងមានពន្លឺខ្លះហើយ៕
