12-មករា-2023 - ម៉ោង 11:20:AM
តាកែវ៖ ថ្លែងនៅក្នុងពិធីបូកសរុបលទ្ធផលការងាររដ្ឋបាលក្រុង ប្រចាំឆ្នាំ២០២២ និង លើកទិសដៅបន្ត ឆ្នាំ២០២៣ កាលពីរសៀលថ្ងៃទី១១ ខែមករា ឆ្នាំ២០២៣នេះ លោក កង អាណាន់ អភិបាលក្រុងដូនកែវ បានធ្វើការណែនាំទៅដល់អាជ្ញាធរដែនដី គណៈគ្រប់គ្រងសាលានៅទូទាំងក្រុង ត្រូវសហការជាមួយមន្ត្រីជំនាញ ចុះត្រួតពិនិត្យជាប់ជាប្រចាំអំពីសុវត្ថិភាពចំណីអាហារ ដែលមានដាក់លក់នៅតាមសាលារៀនរដ្ឋ និងសាលារៀនឯកជននានា នៅទូទាំងក្រុងដូនកែវ ដើម្បីបង្ការនូវផលប៉ះពាល់ដល់សុខភាពសាធារណៈ ជាពិសេសសិស្សានុសិស្ស ដែលជាជនងាយរងគ្រោះផលប៉ះពាល់ទាំងនេះ ។
លោក កង អាណាន់ អភិបាលក្រុងដូនកែវ បានបន្ថែមទៀតថា សុវត្ថិភាពចំណីអាហារនៅតាមសាលារៀននេះ យើងត្រូវតែបង្កើនការយកចិត្តទុកដាក់ និងត្រូវពង្រឹងឱ្យបានខ្ពស់អំពីសុវត្ថិភាពចំណីអាហារនេះ ដើម្បីកុំឱ្យសិស្សា នុសិស្ស ទទួលរងនូវផលប៉ះពាល់ដល់សុខភាព ដោយសារ តែចំណី និងអាហារក្រៀមវេចខ្ចប់ទាំងនោះ ហួសកាលបរិច្ឆេទប្រើប្រាស់ ឬមានសារធាតុគីមីផ្សេងៗ អ្វីដែលសំខាន់គឺអាជ្ញាធរមូលដ្ឋាន រដ្ឋបាលក្រុង សង្កាត់ ភូមិ ត្រូវរួមសហការគ្នាល្អជាមួយមន្ត្រីជំនាញ និងស្នើដល់មន្រ្តីជំនាញសាខាការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ សូមសហការចុះត្រួតពិនិត្យឡើងវិញនូវចំណីអាហារផ្សេងៗ នៅតាមសាលារៀនឱ្យបានជាប់ជាប្រចាំ ដោយមិនត្រូវបណ្តែតបណ្តោយនោះឡើយ ព្រោះសិស្សានុសិស្សទាំងនោះ គឺជាធនធានមនុស្សដ៏សំខាន់របស់ជាតិយើង ក្នុងការរួមកម្លាំងគ្នាកសាងនិងអភិវឌ្ឍន៍ប្រទេសជាតិឱ្យកាន់តែមានការរីកចម្រើនថែមទៀតទៅថ្ងៃអនាគត់ ។
ជាមួយគ្នានេះដែរ លោក កង អាណាន់ អភិបាលក្រុងដូនកែវ ក៏បានណែនាំបន្ថែមទៀតដល់ មន្រ្តីនៃការិយាល័យអប់រំក្រុង ត្រូវកោះហៅក្រុមអាជីវករលក់នំ ចំណី អាហារផ្សេងៗ នៅតាមសាលារៀនរដ្ឋ និងឯកជនទាំងអស់ មកប្រជុំផ្សព្វផ្សាយឱ្យពួកគាត់យល់ដឹងកាន់តែច្បាស់ថែមទៀត ជាពិសេសត្រូវសហការបន្ថែមជាមួយមន្រ្តីជំនាញសុវត្ថិភាពចំណីអាហារ ត្រូវអោយពួកគាត់ចុះមកធ្វើការពន្យល់អំពីផលប៉ះពាលនានា និងយល់ដឹងកាន់តែច្បាស់អំពីសុវត្ថិភាពចំណីអាហារ ក៏ដូចជានីតិវិធីច្បាប់មួយចំនួន ប្រសិនក្រុមអ្នកលក់ប្រព្រឹត្តិខុស ៕
