27-កក្តដា-2023 - ម៉ោង 03:27:PM
លោក អ៊ូច ភា អភិបាលខេត្តតាកែវ បានធ្វើការជម្រុញដល់អាជ្ញាធរមូលដ្ឋានក្រុង-ស្រុក ឃុំ-សង្កាត់ និងអង្គការសង្គមស៊ីវិលដែលជាដៃគូរត្រូវសហការគ្នាដោះស្រាយបញ្ហាប្រឈមនានាដែលជាទុកកង្វល់របស់ប្រជាពលរដ្ឋ ពោលគឺធ្វើយ៉ាងណាដើម្បីពួកគាត់មានទំនុកចិត្តមកលើអាជ្ញាធរមូលដ្ឋានរបស់យើងដែលជាអ្នកដោះស្រាយជូនគាត់។
ថ្លែងនៅក្នុងឱកាសអញ្ជើញ ជាអធិបតីភាពក្នុងកិច្ចប្រជុំឆ្លុះបញ្ចាំង ស្ដីពីវឌ្ឍនភាព នៃការអនុវត្តការងារគណនេយ្យភាពសង្គម ប្រចាំឆមាសទី១ ឆ្នាំ២០២៣ របស់រដ្ឋបាលខេត្តតាកែវ នាព្រឹកព្រហស្បតិ៍ ថ្ងៃទី២៧ ខែកក្កដា ឆ្នាំ២០២៣នេះ នៅសាលប្រជុំទីចាត់ការផែនការ និងវិនិយោគខេត្ត លោក អ៊ូច ភា អភិបាលខេត្តតាកែវបានមានប្រសាសន៍ថា ក្នុងនាមយើងជាអាជ្ញាធរមូលដ្ឋាន ជាអ្នកបំរើ ប្រជាពលរដ្ឋ ដ៏ស្មោះត្រង់ និងជាអាណាព្យាបាលរបស់ប្រជាពលរដ្ឋ យើងត្រូវបន្តសកម្មភាព ចុះដល់ខ្នងផ្ទះប្រជាពលរដ្ឋ ដើម្បីបានដឹងពីសុខទុក្ខ និងបញ្ហាសំណូមពរ ទុកកង្វល់ផ្សេងៗ ដែលទាមទារអាជ្ញាធរយើងជួយដោះស្រាយភ្លាមៗ ។ ដូច្នេះដើម្បីយកបេះដូង និងការពេញចិត្ត ពីប្រជាពលរដ្ឋ អាជ្ញាធរភូមិឃុំ រួមនឹងសមត្ថកិច្ចពាក់ព័ន្ធ បណ្ដាអង្គការនានា ត្រូវធ្វើជាវេទិការដោះស្រាយ បញ្ហា សំណូម ពរផ្សេងៗជូនប្រជាពលរដ្ឋអោយបានល្អ តាមរយៈការដោះស្រាយទំនាស់ក្រៅប្រព័ន្ធតុលាការ ដើម្បីសម្របសម្រួលវិវាទទាំងនោះ និងចូលរួមកាត់បន្ថយការចំណាយរបស់បងប្អូនប្រជាពលរដ្ឋ នៅពេលមានការប្ដឹងផ្ដល់ គ្នាឈាន ទៅ ដល់តុលាការ។
លោកអភិបាលខេត្តតាកែវ បានបញ្ជាក់ថា ការដោះស្រាយវិវាទក្រៅប្រព័ន្ធតុលាការ វាជាយន្តការមួយដែលរាជរដ្ឋាភិបាលកម្ពុជាបានដាក់ចេញ ដោយផ្អែកតាមច្បាប់ជាធរមាន ដើម្បីផ្ដល់ភាពងាយស្រួលដល់ប្រជាពលរដ្ឋ ដែលមានវិវាទផ្សេងៗ ទាមទារឱ្យអាជ្ញាធរ ធ្វើកិច្ចអន្តរាគមន៍ ជួយដោះស្រាយបានទាន់ពេលវេលា ប្រកបដោយប្រសិទ្ធភាពខ្ពស់ និងតម្លាភាព ដោយភាគី ជម្លោះ ទទួលបានការដោះស្រាយមួយសមហេតុផលទាំងសងខាង។
ជាមួយគ្នានោះដែរអភិបាលខេត្តតាកែវ លោក អ៊ូច ភា ក៏បានណែនាំបន្ថែមទៀតថា ដល់អាជ្ញាធរមូលដ្ឋាន ត្រូវខិតខំបម្រើសេវាសាធារណៈជូនបងប្អូនប្រជាពលរដ្ឋអោយបានល្អប្រសើរលឿន ឆាប់រហ័ស ទាន់ពេលវេលា និងបន្តបង្កើនកិច្ចសហការណ៍ជាមួយបណ្ដាអង្គការសង្គមស៊ីវិលពាក់ព័ន្ធនានាបន្តទៀត ទំាងថ្នាក់ជាតិ និងថ្នាក់ក្រោមជាតិ ផ្នែកគណនេយ្យភាពសង្គម ឲ្យកាន់តែល្អប្រសើរឡើងថែមទៀត ស្របតាមគោលនយោបាយរបស់រាជរដ្ឋាភិបាលកម្ពុជាបច្ចុប្បន្ន៕
