អភិបាលខេត្តតាកែវ អំពាវនាវមន្រ្តីរាជការ និងប្រជាពលរដ្ឋ ធ្វើចលនារួមគ្នាក្នុងការសំអាតបរិស្ថាន អានម័យឱ្យបានស្អាតល្អគ្រប់ទីន្លែងទាំងអស់

23-វិច្ឆិកា-2021 - ម៉ោង 03:34:PM

តាកែវ៖ នៅក្នុងឱកាសអញ្ជើញដឹកនាំមន្រ្តីរាជការសាលាខេត្ត មន្ទីរអង្គភាពជុំវិញខេត្ត សិស្ស និស្សិត និងប្រជាពលរដ្ឋ ដើររើសសំរាមនៅក្នុងទិវាបរិស្ថានអនាម័យជាតិ២៣វិច្ឆិកា នាព្រឹកថ្ងៃអង្គារ៍ ទី២៣ ខែវិច្ឆិកា ឆ្នាំ២០២១ លោក អ៊ូច ភាអភិបាលខេត្តតាកែវ បានធ្វើការអំពាវនាវទៅដល់មន្រ្តីរាជការ និង បងប្អូន ប្រជាពលរដ្ឋ ត្រូវធ្វើជាសកម្មភាពជាប់ជាប្រចាំដោយធ្វើចលនារួមគ្នាក្នុងការសំអាតបរិស្ថាន ឱ្យ បាន ស្អាតល្អនៅគ្រប់ទីន្លែងទាំងអស់ ។

លោក អ៊ូច ភា អភិបាលខេត្ត បានមានប្រសាសន៍បន្តទៀតថា ការចូលរួមទាំងអស់គ្នា ពិសេសគឺយើងធ្វើចលនារួមគ្នា ក៏ដូចជាមានការចូលរួមពីសំណាក់បងប្អូនប្រជាពលរដ្ឋ នោះការ សំអាត បរិស្ថានអនាម័យនៅក្នុងមូលដ្ឋានរបស់យើង និងកាន់តែល្អស្អាតគ្រប់ទីកន្លែង មិនថាតែទីកន្លែង សាធារណៈ សួនច្បារ តាមដងផ្លូវ កន្លែងធ្វើការ និងតាមខ្នងផ្ទះរបស់បងប្អូនប្រជាពលរដ្ឋ ។

លោកអភិបាលខេត្ត បន្ថែមថា បរិស្ថានអនាម័យល្អស្អាត គឺផ្តើមចេញពីយើងម្នាក់ៗ បើកាល ណាយើងមានទម្លាប់ល្អ គឺធ្វើឱ្យយើងរស់នៅក្នុងស្ថានភាពបរិស្ថានល្អ ខ្យល់អាកាសល្អបរិសុទ្ធិ នឹងធ្វើ ឱ្យភូមិយើងស្អាត និងការស់នៅរបស់យើងក៏កាន់តែរីករាយផងដែរ ហើយម្យ៉ាងទៀត មន្ទីរអង្គភាព ជុំវិញខេត្ត ពិសេសមន្ទីរបរិស្ថាន និងមន្ទីរវប្បធម៌ ត្រូវដើរតួជាស្នូល ក្នុងការបំផុសចលនា និងអប់រំ ប្រជាពល រដ្ឋឱ្យស្រឡាញ់បរិស្ថានអនាម័យនេះ និងបន្តរួមគ្នាធ្វើកិច្ចការងារឱ្យជាប់ជាប្រចាំ ។

បើតាម អភិបាលខេត្តតាកែវ ការរៀបចំទិវាបរិស្ថានអនាម័យនេះ ក្នុងគោលបំណងក្រើនរំលឹក ស្មារតីបងប្អូនប្រជាពលរដ្ឋទាំងអស់ និងក្រុមបណ្តាក្រុងស្រុក ធ្វើជាចលនាមួយ ក្នុងការ សំអាត បរិស្ថានរបស់យើងអោយស្អាតល្អ និងមានភាពស្រស់បំព្រង រួមចំណែកគ្នាការពារ និងសំអាតបរិស្ថាន ហើយក៏អាចឱ្យបងប្អូនបានយល់ដឹងកាន់តែច្បាស់ថែមទៀតអំពីផលវិបាកនៃបរិស្ថានអនាម័យ និងមាន ទម្លាប់បោះចោលសំរាមនៅក្នុងធុងសំរាមជានិច្ច ៕