04-សីហា-2021 - ម៉ោង 08:25:PM
តាកែវ៖ លោក អេង ប៉ជាក អនុប្រធានចលនាយុជន កម្ពុជាក្រុម១៥៧ សាខាខេត្តតាកែវ តំណាងលោក កែវ វ៉ាន្នី ប្រធាន រួមនឹងក្រុមការងារ បាននាំយកគ្រែចំនួន២០ ទឹកសុទ្ធ ២៥កេស ម៉ាស់ ១កេសធំ ដល់តំបន់ប្រតិបត្តិការសឹង រងខេត្តតាកែវ ទុកសម្រាប់ធ្វើចត្តាឡីស័ក ទៅដល់មន្រ្តីយោធា ណាដែលមាន ការប៉ះពាល់ដោយដោយប្រយោលនៅកងពលតូច ២ ដែលស្ថិតក្នុងឃុំរនាម ស្រុកទ្រាំង ខេត្តតាកែវ ។ ពិធីប្រគល់និងទទួលនេះ ធ្វើឡើងនៅរសៀលថ្ងៃ ពុធ ទី០៤ ខែសីហា ឆ្នាំ ២០២១ ដោយមានការអញ្ជើញ ចូលរួមទទួលពីលោកឧត្តមសេនីយ៍ត្រី នាង សុភារ៉ា មេបញ្ជាការតំបន់ប្រតិបត្តិការសឹងរងខេត្តតាកែវ និង លោកមេបញ្ជាការរងតំបន់ប្រតិបត្តិការសឹងរងខេត្តផងដែរ។
នៅក្នុងឱកាសប្រគល់ និងទទួលគ្រែនេះផងដែរ លោក អេង ប៉ជាក អនុប្រធាន បានពាំនាំប្រសាសន៍ លោកប្រធានចលនាយុវជនកម្ពុជាក្រុម ១៥៧ សាខាខេត្តតាកែវ ថា ដោយមើលឃើញពីស្ថានភាព នៅប្រទេសកម្ពុជារបស់យើង ការឆ្លងរាតត្បាតជំងឺកូវីដ១៩ នៅមិនទាន់ធូរស្បើយ និយាយដោយឡែក សម្រាប់ខេត្តតាកែវ ក៏នៅតែឆ្លងរាលដាលនៅសហគមន៍ឥតឈប់ឈរ ហើយអ្នកជំងឺកូវីដ១៩ ចេះតែ កើនឡើង ទើបរូបលោកបានចាត់ឲ្យក្រុមការងារនាំយកគ្រែចំនួន២០ ទឹកសុទ្ធ និងម៉ាស់ជូនដល់តំបន់ ប្រតិបត្តិការសឹងរងខេត្តតាកែវ ទុកសម្រាប់ឱ្យមន្រ្តីធ្វើចត្តាឡីស័កក្នុងកម្រិតស្រាលរបស់អង្គភាពខ្លួន ។
ជាមួយគ្នានេះដែរ លោកឧត្តមសេនីយ៍ត្រី នាង សុភារ៉ា មេបញ្ជាការតំបន់ប្រតិបត្តិការសឹងរងខេត្តតាកែវ ក៏បានថ្លែងអំណរគុណយ៉ាងជ្រាលជ្រៅចំពោះលោក កែវ វ៉ាន្នី រួមនឹងក្រុមការងារចលនាយុវជន កម្ពុជា ក្រុម ១៥៧ សាខាខេត្តតាកែវ ដែលបានឧបត្ថម្ភគ្រែ និងសម្ភារៈមួយចំនួន ឡើងដើម្បីទុកសម្រាប់ឱ្យ មន្រ្តីរបស់តំបន់ប្រតិបត្តិការសឹងរងខេត្តតាកែវ ណាដែលបានឆ្លងជំងឺកូវីដ១៩ ក្នុងស្ថានភាពកម្រិតស្រាល ហើយតាមរយៈសកម្មភាពឧបត្ថម្ភគ្រែទាំងនេះ សបញ្ជាក់ឱ្យឃើញពីការយកចិត្តទុកដាក់ ក៏ដូចជាការជួយចែករំលែកការលំបាកជាមួយរាជរដ្ឋាភិបាលកម្ពុជា ដែលកំពុង តែប្រយុទ្ធប្រឆាំងជំងឺកូវីដ១៩ ៕