10-មិថុនា-2021 - ម៉ោង 02:42:PM
ភ្នំពេញ៖ រដ្ឋមន្រ្តីក្រសួងមហាផ្ទៃ សម្ដេចក្រឡាហោម ស ខេង បញ្ជាឲ្យអភិបាលខេត្តជាប់ ព្រំដែនកម្ពុជា វៀតណាម ពង្រឹងត្រួតពិនិត្យការចេញ-ចូលឆ្លងកាត់ព្រំដែន ដើម្បីទប់ស្កាត់ការរីករាលដាល ជំងឺកូវីដ១៩ប្រភេទថ្មី។
សម្ដេច ស ខេង បានរំលឹកថា នាពេលកន្លងមកដើម្បីប្រយុទ្ធប្រឆាំងទប់ស្កាត់ការឆ្លងរីករាលជំងឺកូវីដ-១៩ នៅកម្ពុជា ក្រសួងមហាផ្ទៃដាក់មានចេញវិធានការពង្រឹង ដើម្បីបង្ការ ទប់ស្កាត់ និងបង្ក្រាបសកម្មភាពឆ្លងដែនដោយខុសច្បាប់ និងការលួចលាក់នាំជនបរទេសចេញពីភូមិសាស្ដ្របិទខ្ទប់ នេះបើយោងតាមលិខិតរបស់ក្រសួងមហាផ្ទៃ កាលពីថ្ងៃទី៩ ខែមិថុនា ឆ្នាំ២០២១ ម្សិលមិញនេះ។
សម្ដេចបានគួសបញ្ជាក់ថា ដើម្បីរក្សាចំណងមិត្តភាព និងពង្រឹងកិច្ចសហប្រតិបត្តិការរវាងអាជ្ញាធរខេត្តនៃព្រះរាជាណាចក្រកម្ពុជា និងអាជ្ញាធរខេត្តនៃសាធារណរដ្ឋសង្គមនិយម វៀតណាមដែលមានព្រំប្រទល់ជាប់គ្នា គឺដើម្បីបង្ការទប់ស្កាត់ការនាំជំងឺកូវីដ-១៩ ឆ្លងកាត់ព្រំដែនប្រទេសទាំងពីរ ក្រសួងមហាផ្ទៃ សូមធ្វើការណែនាំដល់ឯកឧត្តមអភិបាលខេត្តជាប់ព្រំដែនប្រទេសទាំងពីរ ត្រូវយកចិត្តទុក ដាក់លើកិច្ចការនេះ»។
សម្តេចបន្ថែមថា ចំពោះការសម្របសម្រួល និងទំនាក់ទំនងជាមួយអភិបាលខេត្តជាប់ព្រំដែននៃប្រទេសទាំងពីរ ត្រូវអនុវត្តតាមវិធានការនានារបស់រាជរដ្ឋាភិបាល និង ក្រសួងសុខាភិបាល ក្នុងការទប់ស្កាត់ជំងឺកូវីដ-១៩ តែមួយវិញទៀត ត្រូវលើកកម្ពស់កិច្ចសហប្រតិបត្តិការក្នុងការផ្លាស់ប្ដូរទំនិញ កសិផល គ្រឿងឧបភោគបរិភោគនៅតាមតំបន់ព្រំដែន សំដៅរួមគា្នដោះស្រាយជីវភាពរស់នៅ របស់ប្រជាពលរដ្ឋនៃប្រទេសទាំងពីរ ក្នុងតំណាក់កាលនៃការីករាលដាលជំងឺកូវីដ-១៩៕