12-មករា-2023 - ម៉ោង 03:17:PM
តាកែវ៖ លោក កង អាណាន់ អភិបាលក្រុងដូនកែវ បានធ្វើការដាស់តឿន និងណែនាំដល់មន្រ្តីជំនាញ ត្រូវសហការជាមួយអាជ្ញាធរពាក់ព័ន្ធ ចុះពិនិត្យមើលសំណង់ទាំងឡាយណា ដែលពុំទាន់បានសុំច្បាប់ អនុញ្ញាត ត្រូវជម្រុញពួកគាត់ឱ្យមកស្នើសុំច្បាប់អនុញ្ញាតឱ្យបានត្រឹមត្រូវ ជាពិសេសត្រូវចុះអនុវត្តតាមនីតិវិធីច្បាប់ ចំពោះសំណង់ទាំងឡាយ ណាដែលសង់រំលោភយកដីចំណីផ្លូវ និងប្រឡាយទឹកសាធារណៈ។
ថ្លែងនៅក្នុងពិធីបូកសរុបលទ្ធផលការងាររដ្ឋបាលក្រុង ប្រចាំឆ្នាំ២០២២ និង លើកទិសដៅបន្ត ឆ្នាំ២០២៣ នារសៀលថ្ងៃពុធ ទី១១ ខែមករា ឆ្នាំ២០២៣ លោក កង អាណាន់ អភិបាលក្រុងដូនកែវ បានថ្លែងសង្កត់ធ្ងន់បែបនេះថា ចំពោះសំណង់ដែលសង់រំលោភបំពានដីចំណីផ្លូវ និងប្រឡាយទឹកសាធារណៈ ត្រូវតែរុះរើចេញជាបន្ទាន់ ហើយមន្រ្តីជំនាញទាំងអស់ ត្រូវចុះពិនិត្យមើលរាល់សំណង់នានា ដែលកំពុងសាងសង់ នៅមូលដ្ឋានសង្កាត់ទាំងបី ជាពិសេសត្រូវធ្វើការណែនាំដល់ម្ចាស់សំណង់ទាំងអស់ ត្រូវសាងសង់មានច្បាប់អនុញ្ញាតត្រឹមត្រូវ ប្រសិនបើរកឃើញថាសំណង់នោះសាងសង់ពុំមានច្បាប់អនុញ្ញាត គឺអាជ្ញាធរពាក់ព័ន្ធមានសិទ្ធអនុវត្តន៍តាមនីតិវិធី។
អភិបាលក្រុងដូនកែវ បានបន្ថែមថា មន្រ្តីជំនាញត្រូវចុះពិនិត្យមើលសាងសង់សំណង់រឹងមាំនានា ដែលរំលោភបំពានចំណីផ្លូវ និងប្រឡាយទឹកសាធារណៈនានានៅក្នុងសង្កាត់ទាំងបី ត្រូវរាយការណ៍មក គណៈបញ្ជាការឯកភាពរដ្ឋបាលក្រុង មានវិធានការទាន់ពេលវេលា ដើម្បីទប់ស្កាត់រាល់ការសាងសង់សំណង់ខុសច្បាប់របស់ប្រជាពលរដ្ឋ។ លោកអភិបាលក្រុង ក៏បានបញ្ជាក់ដែរ ប្រសិនមន្រ្តីជំនាញរបស់យើងចុះត្រួតពិនិត្យហើយ រកឃើញសំណង់ដែលកំពុងសាង សង់មិនទាន់ មានច្បាប់អនុញ្ញាតនោះ គឺមន្រ្តីរបស់យើង ត្រូវធ្វើការពន្យល់ និងជម្រុញម្ចាស់សំណង់ មកដាក់ពាក្យស្នើសុំច្បាប់អនុញ្ញាតឱ្យបានត្រឹមត្រូវ។
លោក កង អាណាន់ អភិបាលក្រុងដូនកែវ ក៏បានបញ្ជាក់ផងដែរថា ក្រុមហ៊ុនសាងសង់ទាំងអស់ នៅក្នុងក្រុង ត្រូវធ្វើច្បាប់ឲបានត្រឹមត្រូវ ឆ្លើយតបទៅនឹងបទដ្ឋានបច្ចេកទេសសំណង់ ព្រមទាំងមានការទទួលខុសត្រូវ និងត្រួតពិនិត្យ ការដ្ឋានសាងសង់របស់ខ្លួនឲ្យបានហ្មត់ចត់ ចៀសវាងការធ្វេសប្រហែស ដែលអាចបង្កគ្រោះថ្នាក់ជាយថាហេតុ ហើយក្នុងករណីរកឃើញថា ក្រុមហ៊ុនសំណង់ណាមួយ ដែលធ្វើការសាងសង់ ដោយមិនមានលិខិតអនុញ្ញាតតាមផ្លូវច្បាប់ ក្រុមហ៊ុន និងម្ចាស់សំណង់ នឹងត្រូវទទួលខុសត្រូវចំពោះមុខច្បាប់៕
