21-មិថុនា-2022 - ម៉ោង 02:02:PM
ភ្នំពេញ៖ សមត្ថកិច្ចចុះមកធ្វើអន្តរាគមន៍ទាន់ពេលវេលាគណៈទទួលបានពាក្យបណ្តឹងភ្លាមៗថាមានបុរសម្នាក់ប្រដាប់ដោយកាំបិតចុងស្រួចបានចាប់អារ.កគូដណ្តឹងរបស់ខ្លួនបណ្តាលឱ្យរងរបួសធ្ងន់ធ្ងរ ហើយដោយនឹកស្មានថានាងស្លាប់ ក៏អារ.កខ្លួនឯងតាមក្រោយ តែត្រូវបានអ្នកជិតខាងឃើញទាន់។
ករណីខាងលើនេះបានកើតទ្បើងកាលពីវេលាម៉ោង៤និង៣០នាទីទៀបភ្លឺ ឈានចូលថ្ងៃទី២១ ខែមិថុនា ឆ្នាំ២០២២ នៅចំណុចផ្ទះលេខ១៨៩ បន្ទប់លេខ២៣ ភូមិតាងួន២ សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ។
ជនបង្ករមានឈ្មោះ ម៉េង លី ភេទប្រុសអាយុ៣២ឆ្នាំ មុខរបរជាងផ្សារដែក ស្នាក់នៅបន្ទប់ជួលលេខ១៣ ក្នុងភូមិតាងួន២ សង្កាត់កាកាបទី១ ខណ្ឌពោធិ៍សែនជ័យ មានស្រុកកំណើតនៅស្រុកកញ្ច្រៀច ខេត្តព្រៃវែង ។
ចំណែកនារីរងគ្រោះឈ្មោះ កង ឡាំង ភេទស្រី អាយុ២២ឆ្នាំ មុខរបរកម្មការិនីរោងចក្រ ស្នាក់នៅបន្ទប់ជួលលេខ២៣ ក្នុងភូមិតាងួន២ សង្កាត់កាកាបទី១ ខណ្ឌពោធិ៍សែនជ័យ មានស្រុកកំណើតនៅស្រុកទឹកផុស ខេត្តកំពង់ឆ្នាំង។
តាមបញ្ជាក់ឲ្យដឹងពីម្ចាស់ផ្ទះជួលឱ្យដឹងថា មុនពេលកើតហេតុមានអ្នកជួលបន្ទប់ ក្បែរនោះបានខលប្រាប់ថា មានករណីប្តីអារ.កប្រពន្ធនៅក្នុងបន្ទប់ជួលលេខ១៣ ភ្លាមនោះរូបគាត់បានឡើងទៅអើតមើល ឃើញអ្នកទាំង២ដេកលើពូកប្រឡាក់សុទ្ធតែឈាម ពេលនោះគាត់ក៏ស្រែកឆោឡោឡើងឱ្យអ្នកជិតខាងជួយ តែជនដៃដល់បានខ្ទាស់គន្លឹះខាងក្នុង។ ភ្លាមនោះរូបគាត់ក៏បានរាយការណ៍ទៅសមត្ថកិច្ចឲ្យជួយធ្វើអន្តរាគមន៍ ហើយខណៈសមត្ថកិច្ចមកដល់ជនដៃដល់ក៏មិនព្រមបើកទ្វារឱ្យចូលទៀត រហូតសាច់ញាតិជនដៃដល់មកទើបបើកទ្វារឲ្យ។
ក្រោយកើតហេតុសមត្ថកិច្ចបានហៅរថយន្តសង្គ្រោះមកទទួលជនរងគ្រោះនិងជនដៃដល់ទៅមន្ទីរពេទ្យមិត្តភាពកម្ពុជា-ចិន ព្រះកុសុមៈដើម្បីជួយសង្គ្រោះជីវិត។
មូលហេតុ៖ ដែលឈានដល់កើតមានករណីខាងលើនេះ សមត្ថកិច្ចមិនទាន់អាចបញ្ជាក់បាននៅទ្បើយទេ៕