04-មិថុនា-2025 - ម៉ោង 12:47:PM
តាកែវ៖ ដើម្បីចូលរួមប្រយុទ្ធប្រឆាំងនឹងព័ត៌មានក្លែងក្លាយ មន្ទីរព័ត៌មានខេត្តតាកែវនៅព្រឹកថ្ងៃ អង្គារ៍ ទី ៣ ខែ មិថុនា ឆ្នាំ ២០២៥នេះ បានធ្វើការដង្ហែរក្បួន យុទ្ធនាការប្រឆាំងព័ត៌មានក្លែងក្លាយក្រោមពាក្យស្លោក « និយាយថាទេចំពោះព័ត៌មានក្លែងក្លាយ» ដោយរៀបចំនៅវិទ្យាល័យឈើទាល ស្ថិតនៅក្នុងសង្កាត់រកាក្រៅ ព្រមទាំងមានការដង្ហែរក្បួនចាក់ឃោសនស័ព្ទមេក្រូ នៅតាមដងផ្លូវសំខាន់ៗនានានៅក្នុងក្រុងដូនកែវ ខេត្តតាកែវ។
លោក ពៅ សុខន អនុប្រធានមន្ទីរព័ត៌មានខេត្តតាកែវបានថ្លែងឲ្យដឹងថា គោលបំណងនៃការបើកយុទ្ធនាការប្រយុទ្ធប្រឆាំងព័ត៌មានក្លែងក្លាយនៅពេលនេះគឺដើម្បីអប់រំដល់បងប្អូនប្រជាពលរដ្ឋ សិស្សានុសិស្សឲ្យមានការយល់ដឹងពីពត៌មានក្លែងក្លាយ ដែលព័ត៌មានក្លែងក្លាយគឺនិយាយសំដៅដល់ពត៌មានមិនពិត ព័ត៌មានញុះញង់ រើសអើង ឲ្យប្រើអំពើហឹង្សាដែលត្រូវបានគេកែឆ្នៃ ប្រឌិតឡើងក្នុងទំរង់ជាអត្ថបទ រូបភាព សំលេងឬវិដេអូ ហើយយកទៅផ្សព្វផ្សាយលើប្រព័ន្ធអ៊ីនធ័ណេតឬនៅតាមបណ្ដាញទំនាក់ទំនងសង្គម ដែលវានឹងទាញយកការកេញចំណេញលើអាជីវកម្ម នយោបាយជាពិសេសវាបង្កភាពចលាចលនៅក្នុងសង្គម។
បើតាមលោក ពៅ សុខន ព័ត៌មានក្លែងក្លាយបានផ្ដល់ផលប៉ះពាល់យ៉ាងច្រើនដូចជាផលប៉ះពាល់ ខ្លួនឯង ក្រុមគ្រូសារ សន្តិសុខសណ្ដាប់ធ្នាប់សង្គម សេដ្ឋកិច្ច នយោបាយនិងនាំឲ្យបងប្អូនប្រជាពលរដ្ឋបាត់បង់លើការដឹកនាំរបស់អាជ្ញាធឬមកលើការដឹកនាំរបស់រាជរដ្ឋាភិបាល ហើយដើម្បីលប់បំបាត់ពត៌មានក្លែងក្លាយនេះក្រសួងព័ត៌មានបានបង្កើតយុទ្ធសាស្រ្តមួយដើម្បីទប់ស្កាត់ព័ត៌មានក្លែងក្លាយ គឺមិនបង្កើតព័ត៌មានក្លែងក្លាយ មិនផ្សព្វផ្សាយព័ត៌មានក្លែងក្លាយ មិនចែករំលែកព័ត៌មនាក្លែងក្លាយនិងមួយទៀតត្រូវផ្សព្វផ្សាយនិងចែករំលែកតែព័ត៌មានពិតនិងមានប្រភពច្បាស់លាស់។
ឆ្លៀតនៅក្នុងឱកាសនោះលោកអនុប្រធានមន្ទីរព័ត៌មានខេត្តតាកែវក៍បានធ្វើការអំពាវនាវដល់បងប្អូនប្រជាពលរដ្ឋ សិស្សានុសិស្ស ត្រូវជួយផ្សព្វផ្សាយបន្តពីគ្រោះថ្នាក់នៃព័ត៌មានក្លែងក្លាយដល់មឹត្តភ័ក្រនិងក្រុមគ្រូសារខ្លួននិងមិនត្រូវធ្វើការចែករំលែកព័ត៌មានណាដែលគ្មានប្រភពច្បាស់លាស់នោះទេ។
គួបញ្ជាក់ថា នេះមិនមែនជាលើកទីមួយទេដែលមន្ទីរព័ត៌មានខេត្តតាកែវបានធ្វើយុទ្ធនាការប្រយុទ្ធប្រឆាំងពត៌មានក្លែងក្លាយ ពោលកន្លងមកមន្ទីរព័ត៌មានខេត្តតាកែវបានធ្វើសកម្មភាពជាញិកញាប់ក្នុងការផ្សព្វផ្សាយពីគ្រោះថ្នាក់នៃព័ត៌មានក្លែងក្លាយដល់មហាជននិងបានជួបជុំជាមួយអ្នកសារព័ត៌មាននៅក្នុងខេត្តរៀបចំយុទ្ធនាការប្រឆាំងព័ត៌មានក្លែងក្លាយថែមទៀតផង៕
