14-កញ្ជា-2020 - ម៉ោង 03:36:PM
តាកែវ៖ ដើម្បីជាការដាស់តឿន ក៏ដូចជាក្រើនរំលឹកទៅដល់បងប្អូនប្រជាពលរដ្ឋពីគ្រប់មជ្ឈដ្ឋានរួមគ្នា ចូលរួមសំអាត ថែរក្សា និងគ្រប់គ្រងបរិស្ថានអនាម័យអោយបានល្អនោះ ក្រុមហ៊ុនជីបម៉ុង អ៊ិនស៊ី ស៊ីមេន នៅព្រឹកថ្ងៃច័ន្ទ ទី១៤ ខែកញ្ញា ឆ្នាំ២០២០នេះ បាន ប្រគល់ធុងដាក់សំរាមដល់រដ្ឋបាលក្រុងដូនកែវចំនួន២០ធុង សម្រាប់ដាក់នៅតាមសួនច្បារសាធារណៈ ហើយក៏ផ្តល់ភាព ងាយស្រួលដល់បងប្អូនប្រជាពលរដ្ឋក្នុងការទុកដាក់សម្រាមផងដែរ។
មានប្រសាសន៍នៅក្នុងឱកាសនោះដែរលោក ទៀង សុភុៈវិជ្ជា ប្រធានផ្នែកទំនាក់ទំនងសាធារណៈនៃក្រុមហ៊ុនជីបម៉ុង បានមានប្រសាសន៍ថា គោលបំណងនៃសកម្មភាពថ្ងៃនេះ គឺចង់បំផុសស្មារតីស្រឡាញ់ថែរក្សា និងការពារបរិស្ថានអនាម័យទាំងអស់គ្នាតាមរយៈការវេចខ្ចប់ និងការទុកដាក់កាកសំណល់អោយបានត្រឹមត្រូវក្នុងធុងសំរាម ។
លោកប្រធានផ្នែកទំនាក់ទំនងសាធារណៈនៃក្រុមហ៊ុនជីបម៉ុងបានបន្តថា សំណល់ប្លាស្ទិចនៅក្នុងបរិស្ថានបានក្លាយជាក្ដីកង្វល់មិនត្រឹមតែនៅប្រទេសកម្ពុជាប៉ុណោះទេ ប៉ុន្ដែវាជាក្ដីកង្វល់សម្រាប់ពិភពលោកទាំងមូល ដូច្នោះអ្វីដែលធ្វើអោយប្រសើរឡើងគឺផ្ដើមចេញពីខ្លួនយើងម្នាក់ៗចេះត្រូវស្រឡាញ់បរិស្ថាន សម្អាត វេចខ្ជប់និងទុកដាក់កាកសំណល់ដែលយើងបរិភោគរួចហើយត្រូវដាក់ក្នុងធុងសំរាមជានិច្ចទើបបរិស្ថានយើងស្អាតល្អ គ្មានថង់ប្លាស្ទិច និងគ្មានក្លិនបង្ការផេ្សងៗ។
លោក កង អាណាន់ អភិបាលក្រុងដូនកែវ ក៏បានមានប្រសាសន៍ថ្លែងអំណរគុណទៅដល់ ក្រុមហ៊ុនជីបម៉ុង ដែលបានផ្តល់ធុងសំរាមមករដ្ឋបាលក្រុង សម្រាប់ដាក់តាមទីសួនច្បារសាធារណៈ ហើយក៏ដើម្បីជាការផ្ញើសារទៅដល់បងប្អូនប្រជាពលរដ្ឋ ចូលរួមទាំងអស់គ្នាក្នុងការសំអាត បរិស្ថានអនាម័យនេះនៅតាមទីសាធារណៈ តាមរយៈការបោះសំរាមឬកាកសំណល់ទៅក្នុងធុងសំរាម។
លោក កង អាណាន់ បន្ថែមទៀតថា ជារៀងរាល់ខែ យើងបានយកចិត្តទុកដាក់ដោយសំអាតអនាម័យ២ដង ពោលគឺ២សប្ដាហ៍សំអាតម្ដង ហើយការចូលរួមរបស់ប្រជាពលរដ្ឋពិតជាមនសារៈសំខាន់ ខ្លាំងណាស់ ព្រោះការសំអាតបរិស្ថានអនាម័យនេះគឺផ្តើមចេញពីយើងម្នាក់ៗ ម្យ៉ាងទៀត ប្រសិនជាកន្លែង ដែលយើងរស់នៅ កន្លែងដែលយើងធ្វើការ និងកន្លែងដែលយើងទៅកម្សាន្តសប្បាយ ពិសេសតាមទីសួនច្បារសាធារណៈ ពុំមានសំរាមឬថង់ប្លាសិចហើរតាមខ្យល់ និងពុំមានគ្លិនអាក្រក់កើតឡើងទេ វានឹងធ្វើអោយ ខេត្តរបស់យើង ក្លាយជាខេត្តដែលមានការទាក់ទាញអ្នកទេសចរណ៍មកលេងកាន់តែច្រើន ដែលអាចបង្កើនចំណូលដល់ប្រជាពលរដ្ឋបានមួយផ្នែកពីវិស័យទេសចរណ៍នេះផងដែរ ៕
