04-ឧសភា-2022 - ម៉ោង 09:14:AM
ភ្នំពេញ ៖ សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា សូមផ្ដាំផ្ញើសារទៅកាន់ ឪពុកម្តាយដែលជាអាណាព្យាបាលកូនៗទាំងអស់ កុំឲ្យប្រើវប្បធម៌មួយដែលគេហៅថា យកកូនឯងទៅប្រៀបធៀបជាមួយកូនអ្នកដ៏ទៃ ដែលជាកត្តាវាយប្រហារធ្ងន់ធ្ងរ ទៅលើចិត្តសាស្រ្តរបស់កូន។
ការថ្លែងលើកទ្បើងបែបនេះរបស់សម្តេចតេជោ ហ៊ុន សែន នាយករដ្ឋមន្ត្រី ក្នុងឱកាសអញ្ជើញចួបសំណេះសំណាល និងផ្ដល់រង្វាន់លើកទឹកដល់ដល់សិស្សជាប់និទ្ទេសA នៅព្រឹកថ្ងៃទី៣ ខែឧសភា ឆ្នាំ២០២២នេះ សម្ដេចតេជោមានប្រសាសន៍ថា មាតាបិតា អាណាព្យាបាលគួរត្រូវបានយកចិត្តទុកដាក់លើកូន សូមកុំបង្អាប់កូនឯង និងយកទៅប្រៀបធៀបជាមួយកូនអ្នកដ៏ទៃ។សម្ដេចបញ្ជាក់ថា «នេះគឺជាការវាយប្រហារធ្ងន់ណាស់ ទៅលើចិត្តសាស្រ្តរបស់កូន ។
ក្នុងនោះសម្ដេច ហ៊ុន សែន នាយករដ្ឋមន្ត្រីនៃកម្ពុជា ក៏បានលើកយកបទពិសោធន៍ផ្ទាល់ខ្លួន ក្នុងការគ្រប់គ្រង និងបណ្ដុះបណ្ដាលកូនរបស់សម្ដេច ដោយចាត់ទុកថា ទទួលបានជោគជ័យហើយ ប៉ុន្តែសម្ដេចនៅមានកាតព្វកិច្ចរួមជាមួយកូនក្នុងការអប់រំចៅបន្តទៀត។
សម្ដេចបានលើកជាឧទាហរណ៍១ថា «ហែងមួយថ្ងៃៗ គិតតែលេងហ្គេម ហែងមើលកូនគេនោះគេរៀន ហែងរៀនមិនពូកែ ហែងមើលកូនគេនោះគេពូកែ»។
សម្ដេចបញ្ជាក់បន្ថែមថា «កុំឲ្យសោះបទពិសោធន៍មួយនេះ គឺវាយបំបាក់ទឹកចិត្តកូនខ្លួនឯង។ ត្រូវលើកទឹកចិត្តឲ្យកូនប្រឹង តែកុំយកកូនទៅប្រៀបធៀបជាមួយកូនអ្នកដ៏ទៃ សូម្បីតែក្នុងគ្រួសារតែមួយ៕
