07-គុម្ភះ-2022 - ម៉ោង 09:42:AM
ខេត្តតាកែវ៖ ក្រុមប្រជាពលរដ្ឋមួយចំនួនដែលរស់នៅក្នុងក្រុងដូនកែវ កំពុងតែរអ៊ូរទាំចំពោះក្រុមហ៊ុនប្រមូលសំរាម តាកែវពៅ របស់លោកស្រី លឹម សុខា ថា ការប្រមូលសំរាមរបស់គាត់នៅតាមផ្ទះ និងតាមទីប្រជុំជននានាក្នុងក្រុង ទុករយៈពេលចាប់ពី៥ថ្ងៃទៅ១សប្តាហ៍ទើបប្រមូលម្តង រហូតសំរាមទាំងនេះទុកដល់ស្អុយរលួយ និងទុកបង្អួតសម្រស់ភ្ញៀវទេសចរណ៍ ហើយខ្លះទៀតហើរតាមខ្យល់ ដែលអាចបង្ករឱ្យមានផលប៉ះពាល់ដល់សុខភាព និងសណ្តាប់ធ្នាប់សាធារណៈ។
ប្រជាពលរដ្ឋម្នាក់សុំមិនបញ្ចេញឈ្មោះ បានគ្នានិយាយថា សំរាមតាមផ្ទះក៏មានការកើនឡើង និងសំរាមនៅក្នុងផ្សារធំតាកែវ ក៏ដូចជានៅតាមទីប្រជុំជនផ្សេងៗ ក៏កាន់តែមានការកើនឡើងជាបន្តបន្ទាប់ ដោយសារតែការប្រមូលសំរាម របស់ក្រុម ហ៊ុន (តាកែវពៅ) កម្មសិទ្ធលោកស្រី លឹម សុខា ហាក់បីដូចជាមានសភាពមហាយឺតយ៉ាវ គ្មានឡានដឹក ឬគ្មានកម្មករដើរប្រមូល ឬអាចនិយាយបានថា ការប្រមូលសំរាម របស់ ក្រុមហ៊ុនខាងលើនេះ មិនមានលទ្ធភាពគ្រប់គ្រាន់ក្នុងការគ្រប់គ្រង សំរាមនេះឱ្យបាន ល្អស្អាត ដែលជាហេតុបង្ករឱ្យមានការជះក្លិនមិនល្អ និងប៉ះពាល់ដល់សុខភាពជាយថាហេតុ ដោយសារតែក្នុងក្រុងដូនកែវ មានក្រុមហ៊ុនប្រមូលសំរាមតែមួយ ។
បងប្អូនប្រជាពលរដ្ឋរស់នៅក្នុងក្រុងដូនកែវ បានអំពាវនាវដល់ អាជ្ញាធរក្រុងដូនកែវ មេត្តាពិនិត្យ និងជួយជំរុញដល់ក្រុមហ៊ុន ប្រមូលសំរាម (តាកែវពៅ) របស់ លោកស្រី លឹម សុខា ពន្លឿនការប្រមូលសំរាមនេះ ឱ្យបានឆាប់រហ័សជាងមុន ដោយកុំទុកសំរាម រយៈពេលយូរ ដែលធ្វើឱ្យសម្រាមមានសភាពស្អុយរលួយ និងជះក្លិនមិនល្អ បង្ករមានផល ប៉ះពាល់ផ្សេងៗ ដើម្បីរក្សានូវសោភ័ណ្ឌភាពទីក្រុងស្អាត និងសុខមាលភាពរបស់បងប្អូន ប្រជាពលរដ្ឋរបស់យើងផងដែរ ។
បន្ថែមពីនេះដែរ ប្រជាពលរដ្ឋ សំណូមពរដល់អាជ្ញាធរពាក់ព័ន្ធ មេត្តាជួយស្វែងរកក្រុមហ៊ុន ណាមកធ្វើការវិនិយោគបន្ថែមទៀត លើបញ្ហាសំរាម នៅក្នុងក្រុងដូនកែវ ដើម្បីកុំអោយមាន ជំងឺតួរឯក បន្តទៀត របស់ លោកស្រី លឹម សុខា អតីតអ្នកប្រមូលភាស៊ីផ្សារធំតាកែវ ចាស់វស្សា ប្រមូលតែលុយ តែគ្មានអភិវឌ្ឍន៍អ្វីបន្តិចសោះ ។
ជុំវិញបញ្ហាដែលក្រុមប្រជាពលរដ្ឋនាំគ្នារិះគន់ក្រុមហ៊ុនប្រមូលសំរាមតាកែវពៅ របស់លោកស្រី លឹម សុខានេះ ក្រុមការងាររបស់យើងមិនអាចទាក់ទងលោកស្រី លឹម សុខា បានទេ ៕
