01-សីហា-2023 - ម៉ោង 09:35:AM
តាមរយះសារពលរដ្ឋ បានលួចខ្សឹបប្រាប់ថា មានករណីលួចសង់សំណង់រឹងមាំ គ្រោងរៀបចំទៅជា កំពង់ផែ សម្រាប់ដោះដូរទំនិញ នៅខាងត្បូងប្រឡាយទឹកលេខ១២ ចម្ងាយ ១០០ម៉ែត្រ ស្ថិតនៅភូមិព្រែកតាផ ឃុំគោកធ្លក ស្រុកអង្គរបូរី ខេត្តតាកែវ ជាកម្មសិទ្ធិរបស់ឈ្មោះ កាំង ប៊ុនលី ។
ពលរដ្ឋបានអះអាងថា ម្ចាស់សំណង់នេះ មិនដឹងថាខ្សែធំកម្រិតណាទេ នៅតែបន្តលួចសាងសង់ជាបន្តបន្ទាប់ បើទោះបីជាអាជ្ញាធរ និងមន្រ្តីជំនាញ ធ្លាប់ចុះមកហាមឃាត់ជាច្រើនដងកន្លងមកហើយ។
លោក ណុប នី ប្រធានមន្ទីរសាធារណៈការ និងដឹកជញ្ជូនខេត្ត បានថ្លែងប្រាប់ នៅព្រឹកថ្ងៃទី០១ ខែសីហា នេះថា សំណង់រឹងមាំ ដែលពលរដ្ឋលើកឡើងថា គ្រោងសង់ទៅជាកំពង់ផែនេះ គឺខាងមន្ទីរជំនាញ មិនទាន់ទទួលបានលិខិតស្នាមអ្វីនៅឡើយទេ។
ដោយឡែក លោក នួន សុធា ប្រធានមន្ទីររៀបចំដែនដី នគររូបនីយកម្ម និងសំណង់ខេត្ត បានលើកឡើងថា ចំពោះសំណង់សាងសង់នានា គឺវាមានតាមកម្រិត សំណង់រឹងមាំត្រឹមណា សុំច្បាប់ត្រឹមក្រុងស្រុក ហើយសំណង់រឹងមាំខ្នាតធំៗ គឺត្រូវមកសុំច្បាប់នៅថ្នាក់ខេត្ត ឬក្រសួង។ លោកប្រធានមន្ទីរបានបន្តថា ចំពោះករណីសំណង់រឹងមាំសង់ចូលប្រឡាយទឹកនេះ គឺខាងមន្ទីរមិនទាន់ទទួលបានលិខិតស្នើសុំណាមួយឡើយ ។
ជុំវិញករណីនេះដែរ លោក រស់ ប៊ុនធឿន អភិបាលស្រុកអង្គរបូរី បានថ្លែងប្រាប់ នៅបណ្ដាញសារព័ត៌មាន នៅព្រឹកថ្ងៃទី០១ ខែសីហា ឆ្នាំ២០២៣ ថា សំណង់រឹងមាំ ដែលបានសង់ចូលប្រឡាយទឹកនេះ គឺមិនទាន់មានច្បាប់អនុញ្ញាតត្រឹមត្រូវ ប៉ុន្តែម្ចាស់កម្មសិទ្ធសំណង់ កំពុងតែរត់ការច្បាប់សាងសង់ តាមក្រោយ ហើយអាជ្ញាធរស្រុក និងមន្រ្តីជំនាញ ក៏ធ្លាប់ចុះទៅហាមឃាត់ច្រើនលើកមកហើយ ប៉ុន្តែម្ចាស់សំណង់នៅតែបន្តលួចសាងសង់៕
https://www.youtube.com/shorts/jRkHXiusCkQ
