29-មិថុនា-2021 - ម៉ោង 09:19:PM
អន្តរជាតិ៖ នេះបើតាមនាយកចាត់ការទូទៅរបស់ក្រុមហ៊ុន Sinovac ដែលធ្វើការដកស្រង់ចេញ ផ្សាយដោយសារព័ត៌មានរដ្ឋចិន Global Times ថ្ងៃអង្គារ ទី២៩ ខែមិថុនា ឆ្នាំ២០២១ បានឲ្យដឹងថា ការធ្វើតេស្ដវ៉ាក់សាំងចំពោះកុមារមានអាយុ ៣ឆ្នាំ ដល់១៧ឆ្នាំ បានបង្ហាញថាវ៉ាក់សាំង COVID-19 របស់ក្រុមហ៊ុន Sinovac មានសុវត្ថិភាព និងប្រសិទ្ធភាព ដោយវាអាចបង្កើនប្រព័ន្ធភាពសុំាប្រឆាំងនឹងវីរុសដ៏កាចសាហាវមួយនេះ។
ថ្លែងបា្រប់សារព័ត៌មាន Global Times នាយកចាត់ការទូទៅក្រុមហ៊ុន Sinovac លោក Gao Qiang បានគូសបញ្ជាក់ដូច្នេះថា៖ «វ៉ាក់សាំង CoronaVac ពិតជា មានសុវត្ថិភាព និងប្រសិទ្ធភាពចំពោះកុមារ និងកុមារវ័យជំទង់ដែលមានអាយុពី៣ ដល់១៧ឆ្នាំ ដោយវាអាចបង្កើនប្រព័ន្ធភាពសុំាយ៉ាងល្អប្រសើរ...ហើយយើងនឹង ចាប់ផ្ដើមការធ្វើតេស្ដទ្រង់ទ្រាយធំជាបន្តទៀត ដើម្បីកំណត់ឱ្យកាន់តែច្បាស់ពីសុវត្ថិភាព និងប្រសិទ្ធភាពសម្រាប់កុមារ និងកុមារវ័យជំទង់»។
គួរបញ្ជាក់ថា លទ្ធផលធ្វើតេស្ដខាងលើរបស់ក្រុមហ៊ុនចិន Sinovac ជាលទ្ធផលធ្វើតេស្ដ វ៉ាក់សាំង COVID-19 ដំបូងគេបំផុតលើកុមារមានអាយុពី៣ ដល់១៧ឆ្នាំ ដែលចិនបានអនុញ្ញាតការប្រើប្រាស់បន្ទាន់សម្រាប់វ៉ាក់សាំង Sinovac ចំពោះកុមារមានអាយុពី៣ ដល់ឆ្នាំ១៧ឆ្នាំកាលពីដើមខែមិថុនានេះ៕
