03-ឧសភា-2021 - ម៉ោង 03:23:PM
អន្តរជាតិ៖ កាលពីថ្ងៃទី២ខែឧសភា រដ្ឋាភិបាលអង់គ្លេសបានប្រកាសបញ្ជូនជំនួយម៉ាស៊ីនជំនួយដង្ហើមបន្ថែម១០០០គ្រឿងទៀតទៅកាន់ប្រទេសឥណ្ឌា ក្នុងពេលប្រទេសនេះ មានករណីឆ្លងលើសពី៣សែននាក់ក្នុងមួយថ្ងៃរយៈពេល១០ថ្ងៃជាប់ៗគ្នា។
ដោយកន្លងមក រដ្ឋាភិបាលអង់គ្លេសបានបានផ្តល់ជំនួយម៉ាស៊ីនជំនួយដង្ហើម៦០០គ្រឿង និងម៉ាស៊ីនផលិតអុកស៊ីហ្សែនឲ្យដល់ប្រទេសឥណ្ឌា ។
បើតាមការឲ្យដឹងពីរដ្ឋមន្ត្រីការបរទេសអង់គ្លេស លោក Dominic Raab បានប្រកាសថា « ការផ្តល់ជំនួយនេះ នឹងជួយដល់ឥណ្ឌាទប់ស្កាត់ហេតុការណ៍អាក្រក់ ដោយសារតែការឆ្លងរាលដាលកូវីដ-១៩ កើនឡើងខ្ពស់ ហើយឥណ្ឌាមិនមានបរិក្ខារគ្រប់គ្រាន់ដើម្បីព្យាបាលអ្នកជំងឺ»។
ក្នុងនោះក៏មានអាមេរិក អាល្លឺម៉ង់ និងប៉ាគីស្ថាន ក៏បានផ្តល់ជំនួយបន្ទាន់ដល់ប្រទេសឥណ្ឌាផងដែរ។
ការសរុបទិន្នន័យដែលត្រូវបានប្រកាស ដោយក្រសួងសុខាភិបាលឥណ្ឌាខាងលើនេះ ធ្វើឲ្យចំនួនករណីឆ្លង COVID-19 សរុបកើនដល់ ១៩.៥៦លានករណី ក្នុងនោះមានអ្នកស្លាប់ ២១៥,៥៤២នាក់ និងជាសះស្បើយឡើងវិញ ១៥.៩៨លាននាក់។ អ្នកជំនាញជាច្រើននៅឥណ្ឌា បានព្រមានម្តងហើយម្តងទៀតថា ចំនួនអ្នកឆ្លងជាក់ស្តែង អាចនឹងមានច្រើនលើសពីករណីឆ្លងដែលត្រូវបានប្រកាសជាផ្លូវការ ប្រសិនបើការធ្វើតេស្តត្រូវបានធ្វើឡើងដោយគ្រប់ជ្រុងជ្រោយនោះ។
បើតាមអង្គការសុខភាពពិភពលោក (WHO) គ្រាន់តែខែមេសាមួយប៉ុណ្ណោះ ឥណ្ឌាបានកត់ត្រាករណីឆ្លង COVID-19 រហូតដល់ជាង ៧លាននាក់បន្ថែមទៀត៕