21-គុម្ភះ-2023 - ម៉ោង 11:16:AM
ខេត្តតាកែវ៖ យុវជនម្នាក់ត្រូវបានកងរាជអាវុធហត្ថខេត្ត ស្រាវជ្រាវនិងឃាត់ខ្លួនបានកាលពីថ្ងៃទី ២០ ខែកុម្ភៈ ឆ្នាំ២០២៣ នៅចំណុចភូមិថ្នល់បែក សង្កាត់រកាក្រៅ ក្រុងដូនកែវ ក្រោយពីយករូបភាពក្រុមគ្រួសាររបស់មេបញ្ជាការរងអាវុធហត្ថខេត្តម្នាក់ បង្កើតជាគណនី Facebook និង Telegram ក្លែងក្លាយ ក្នុងគោលបំណងជំរិតទារប្រាក់ ។
លោកវរសេនីយ៍ឯក ង៉ែត ចាន់ធី មេបញ្ជាការរងកងរាជអាវុធហត្ថខេត្តតាកែវ បានថ្លៃងប្រាប់បណ្ដាញសារព័ត៌មានឱ្យដឹង នៅព្រឹកថ្ងៃទី២១ ខែកុម្ភះ នេះដែរថា ដោយមាន បទបញ្ជាពី លោកឧត្តមសេនីយ៍ត្រី សេង មហា មេបញ្ជាការកងរាជអាវុធហត្ថខេត្ត និងសម្របសម្រួលនីតិវិធីដោយ ឯកឧត្តម ឯក ឆេងហួត ព្រះរាជអាជ្ញាអមសាលាដំបូងខេត្តតាកែវ កម្លាំងនៃបញ្ជាការដ្ឋានកងរាជអាវុធហត្ថខេត្ត បានធ្វើការឃាត់ខ្លួនជនសង្ស័យម្នាក់ឈ្មោះ កង វីរ:យុទ្ធ ភេទប្រុសអាយុ ២៩ឆ្នាំ មុខរបរមិនពិតប្រាកដ រស់នៅភូមិថ្នល់បែក សង្កាត់រកាក្រៅ ក្រុងដូនកែវ ខេត្តតាកែវ ជាប់ពាក់ព័ន្ធករណីគំរាមជំរិតទារប្រាក់តាមទូរស័ព្ទ និង គំរាមកំហែងហែកកេរ្តិ៍ ដោយប្រើប្រាស់គណនី Facebook និង Telegram ក្លែងក្លាយ ជំរិតទារប្រាក់ ពីពលរដ្ឋជាថ្នូរមិនចុះផ្សាយព័ត៌មាន ។
ដោយឡែកតាមការបញ្ជាក់លម្អិតពី លោកវរសេនីយ៍ឯក ង៉ែត ចាន់ធី បានឱ្យដឹងថា បុគ្គលនេះបានបង្កើតគណនីក្លែងក្លាយមួយ ដោយបានផ្ញើសារមកគំរាមទារលុយ ប្រសិនមិនបាននោះទេ រូបគេនឹងដាក់ផ្សាយព័ត៌មានក្លែងក្លាយ ហែកកេរ្ដិ៍មូលបង្កាច់លើរូបខ្ញុំផ្ទាល់តែម្ដង។ លោកវរសេនីយ៍ឯក មេបញ្ជាការរង បានបន្ថែមថា កន្លងមកបុគ្គលនេះហើយដែលធ្លាប់ប្រើប្រាស់គណនី Facebook និង Telegram ក្លែងក្លាយ គំរាមបង្ហោះព័ត៌មានក្លែងក្លាយចោទប្រកាន់នានាទៅថ្នាក់ដឹកនាំ កាលពីអំឡុងឆ្នាំ២០១៩ ដោយបានធ្វើការបរិហារកេរ្ដិ៍ទម្លាក់ការចោទប្រកាន់លើក្រុមគ្រួសាររបស់ខ្ញុំថា រកស៊ីជួញដូរគ្រឿងញៀន ដោយការចោទប្រកាន់បែបនេះហើយ ខ្ញុំ រួមនឹងក្រុមគ្រួសាររបស់ខ្ញុំ គឺមិនអាចទទួលយកបាននោះទេ សុំបដិសេធន៍ចោលទាំងស្រុង ចំពោះការចោទប្រកាន់មកលើគ្រួសារខ្ញុំបែបនេះ។
ឆ្លៀតក្នុងឱកាសនេះដែរ លោកវរសេនីយ៍ឯក ង៉ែត ចាន់ធី មេបញ្ជាការរងកងរាជអាវុធហត្ថខេត្តតាកែវ ក៏សូមធ្វើការបដិសេធន៍ចោលទាំងស្រុង ចំពោះព័ត៌មានទាំងឡាយណា ដែលត្រូវបានជនមិនស្គាល់អត្តសញ្ញាណបង្ហោះលើបណ្ដាញសង្គម Facebook និង Telegram នានា ដោយធ្វើការចោទប្រកាន់ ខ្ញុំ និងក្រុមគ្រួសាររបស់យើងខ្ញុំ ថាមានរកស៊ីខុសច្បាប់ណា គឺមិនពិតនោះទេ ព្រមទាំងស្នើសុំដល់ អាជ្ញាធរពាក់ព័ន្ធបន្តជួយស្រាវជ្រាវ ចាប់ខ្លួនបំពុលសង្គមទាំងនោះ មកផ្តន្ទាទោសតាមផ្លូវច្បាប់អោយខានតែបាន ៕
