20-មករា-2023 - ម៉ោង 09:19:AM
ខេត្តតាកែវ៖ តុលាការខេត្តតាកែវ បានសម្រេចឃុំខ្លួនជនសង្ស័យម្នាក់ ដោយចោទប្រកាន់បុរសនេះពីបទ «ឆបោក និងញុះញង់ឱ្យប្រព្រឹត្តបទឧក្រិដ្ឌជាអាទ៍ » ក្រោយដើរប្រមូលលុយពីពលរដ្ឋរឿងរត់ការរំលោភយកដីព្រៃសហគមន៍ត្រពាំងធំខាងត្បូង តាមជើងភ្នំដំរីរមៀល ក្នុងភូមិសាស្រ្តឃុំត្រពាំងធំខាងត្បូង ស្រុកត្រាំកក់ ខេត្តតតាកែវ។
ជនសង្ស័យដែលតុលាការសម្រេចចោទប្រកាន់ខាងលើនេះ ត្រូវបានកម្លាំង នៃបញ្ជាការដ្ឋានកងរាជអាវុធហត្ថខេត្តតាកែវ ធ្វើការឃាត់ខ្លួន កាលពីថ្ងៃទី១៨ ខែមករា ឆ្នាំ២០២៣ នៅចំណុចភូមិត្រពាំងជ្រៃ ឃុំត្រពាំងធំខាងត្បូង ស្រុកត្រាំកក់ ដោយបានដើរប្រមូលលុយពីពលរដ្ឋ រត់ការឱ្យរំលោភយកដីរដ្ឋ នៅចំណុចជើងភ្នំដំរីរមៀល ។
បើយោងតាមការដីកាបង្គាប់ឱ្យឃុំខ្លួន សាលាដំបូងខេត្តតាកែវ លេខ ៣២/២០២៣ ចុះថ្ងៃទី១៩ ខែមករា ឆ្នាំ២០២៣ របស់ លោក គុជ តារ៉ា ចៅក្រមស៊ើបសួរ នៃសាលាដំបូងខេត្តតាកែវ ដោយបានសម្រេចចោទប្រកាន់ ឈ្មោះ ឆៃ វុទ្ធី ហៅ វ៉ិត ភេទប្រុស អាយុ ៥៣ឆ្នាំ ជនជាតិខ្មែរ មានអាសយដ្ឋានភូមិត្រពាំងជ្រៃ ឃុំត្រពាំងធំខាងត្បូង ស្រុកត្រាំកក់ ពីបទ ឆបោក និងញុះញង់ឱ្យប្រព្រឹត្តបទឧក្រិដ្ឋជាអាទ៍ ដែលបានប្រព្រឹត្តនៅភូមិត្រពាំងជ្រៃ និងភូមិត្រពាំងកោះ ក្នុងឃុំត្រពាំងធំខាងត្បូង ស្រុកត្រាំកក់ កាលពីថ្ងៃទី១៨ ខែមករា ឆ្នាំ២០២៣ បទល្មើសដែលមានចែងតាមបញ្ញត្តិមាត្រា ៣៧៧ មាត្រា ៣៧៨ និងមាត្រា ៤៩៥ នៃក្រមព្រហ្មទណ្ឌ។
ដោយឡែកតាមការបញ្ជាក់របស់ លោក ស៊ឹម ឡាប៉័ង ប្រធានខ័ណ្ឌរដ្ឋបាលព្រៃឈើតាកែវ បានឱ្យដឹងថា តំបន់ដីព្រៃឈើសហគមន៍ត្រពាំងធំខាងត្បូងនេះ នៅតាមជើងភ្នំដំរីរមៀល កន្លងមកមានជនខិលខូចមួយចំនួន បានចូលកាប់ទន្រ្ទានយកដីព្រៃឈើសហគមន៍ត្រពាំងធំខាងត្បូង យកមកធ្វើជាកម្មសិទ្ធិផ្ទាល់ខ្លួន ហើយថ្មីៗនេះក្រោមការយកចិត្តទុកដាក់ និងបញ្ជាផ្ទាល់ពីសំណាក់ ឯកឧត្តម អ៊ូច ភា អភិបាលខេត្តតាកែវ បានចុះរុះរើរបងដែលជនខិលខូចនោះសាងសង់ ហើយក្នុងនោះយើងបានដកហូតដីព្រៃឈើសហគមន៍មកវិញចំនួន ២៣២ហិកតាផងដែរ ៕
