19-កញ្ជា-2022 - ម៉ោង 08:54:AM
ភ្នំពេញ៖ កាលពីរព្រឹកថ្ងៃទី១៨ ខែកញ្ញា ឆ្នាំ២០២២នេះ លោក ហ៊ុន ម៉ានី ប្រធានស.ស.យ.ក. បានអញ្ជើញជួបសំណេះសំណាលជាមួយគណៈដឹកនាំសាកលវិទ្យាល័យជាតិបាត់ដំបង ដើម្បីស្តាប់ស្ថានការណ៍ និងស្វែងយល់ពីស្ថានភាព នៃសាកលវិទ្យាល័យ ព្រមទាំងដើម្បីពិភាក្សាលើការងារអភិវឌ្ឍយុវជនក្នុងក្របខណ្ឌការងារស្ម័គ្រចិត្ត និងតួនាទី ស.ស.យ.ក. ក្នុងការផ្តល់ឱកាសនានាដល់យុវជន ក៏ដូចជានិស្សិតនៅសកលវិទ្យាល័យ។
ពិធីសំណេះសំណាលក៏មានវត្តមានអញ្ជើញចូលរួមពីសំណាក់ សមាជិកគណៈកម្មាធិការកណ្តាលស.ស.យ.ក. អនុប្រធានអចិន្ត្រៃយ៍ក.យ.គ. ,សាកវិទ្យាធិការ នៃសាកលវិទ្យាល័យជាតិបាត់ដំបង និងជាសមាជិកគណៈដឹកនាំចលនាយុវជនស្ម័គ្រចិត្ត ស.ស.យ.ក. ប្រចាំគ្រឹះស្ថានឧត្តមសិក្សារដ្ឋ ព្រមទាំងគណៈដឹកនាំ សមាជិក សមាជិកា លោកគ្រូ អ្នកគ្រូសាស្ត្រាចារ្យ និស្សិត ជាសមាជិកស.ស.យ.ក. ប្រចាំសាកលវិទ្យាល័យជាតិបាត់ដំបង សរុបប្រមាណ៥០០នាក់។
នាឱកាសនៃពិធីសំណេះសំណាលនេះ លោក សុខ ឃន សាកលវិទ្យាធិការ នៃសាកលវិទ្យាល័យជាតិបាត់ដំបង បានបង្ហាញការស្វាគមន៍យ៉ាងកក់ក្តៅចំពោះវត្តមាន លោក ហ៊ុន ម៉ានី និងបានធ្វើការរាយការណ៍បង្ហាញពីសកម្មភាពដែលសម្រេចបានកន្លងមករបស់សមាជិក សមាជិកា ស.ស.យ.ក. នៃសាកលវិទ្យាល័យជាតិបាត់ដំបង ប្រកបដោយឆន្ទៈ និងស្មារតី ជាពិសេសលើការងាររួមចំណែកជំរុញការយល់ដឹងពីតួនាទីរបស់យុវជនដើម្បីសង្គមជាតិ និងការពង្រឹងភាពជាអ្នកដឹកនាំដល់ប្អូនៗនិស្សិត ក្នុងការក្លាយខ្លួនជាដំណោះស្រាយសម្រាប់សង្គមជាដើម។
លោកបានគូសបញ្ជាក់ថា វត្តមាន ស.ស.យ.ក. នៅតាមគ្រឹះស្ថានឧត្តមសិក្សា គឺជាចលករដ៏សំខាន់ក្នុងការគាំទ្រ លើកទឹកចិត្តយុវជនមានបណ្តុះភាពជាអ្នកដឹកនាំ ដើម្បីជាធនធានសម្រាប់ជាតិ។
ជាមួយគ្នានេះ តាមរយៈសកម្មរបស់ក.យ.គ. ក្រុមនិស្សិតបានចូលរួមយ៉ាងសកម្ម ទាំងកម្លាំងកាយ កម្លាំងចិត្ត និងស្មារតីក្នុងការលើកតម្កើងកិច្ចការស្ម័គ្រចិត្ត និងអភិវឌ្ឍន៍សមត្ថភាព និងបទពិសោធន៍របស់និស្សិតទូទាំងសកលវិទ្យាល័យ៕