15-សីហា-2022 - ម៉ោង 02:53:PM
តាកែវ៖ ជនសង្ស័យ ០៥នាក់ត្រូវបានកម្លាំងនៃបញ្ជាការដ្ឋានកងរាជអាវុធហត្ថខេត្តតាកែវ សហការជាមួយ សមត្ថកិច្ចខេត្តកំពង់ស្ពឺ ឃាត់ខ្លួនកាលពីថ្ងៃទី១៤ ខែសីហា ឆ្នាំ២០២២ នៅចំណុចស្រុកសំរោង ០១នាក់ និង០៤នាក់ នៅស្រុកបសេដ្ឋ ខេត្តកំពង់ស្ពឺ។
លោកវរសេនីយ៍ឯក ង៉ែត ចាន់ធី មេបញ្ជាការរងកងរាជអាវុធហត្ថខេត្តតាកែវ បានឱ្យដឹងថា ដោយមានការសម្របសម្រួលនីតិវិធីដោយ ឯកឧត្តម ឯក ឆេងហួត ព្រះរាជអាជ្ញាអមសាលាដំបូងខេត្តតាកែវ នៅថ្ងៃទី១៤ ខែសីហានេះ កម្លាំងនៃបញ្ជាការដ្ឋានកងរាជអាវុធហត្ថខេត្ត បានចុះបង្រ្កាបករណីគ្រឿងញៀននៅចំណុច ភូមិត្រពាំងគល់ ឃុំខ្វាវ ស្រុកសំរោង ឃាត់ខ្លួនបានជនសង្ស័យម្នាក់ ឈ្មោះ ឈ្មោះ វើង វី ភេទប្រុស អាយុ៣៥ឆ្នាំ ដកហូតបានវត្ថុតាង ថ្នាំញៀនចំនួន ០៣កញ្ចប់ ធំ០២ (តូច០១), ទម្ងន់ ៣២,២៧ក្រាម (ថ្លឹងទាំងសំបក់ថង់) និងទូរសព្ទ័ ១គ្រឿងពណ៏ក្រហម ម៉ាកអូប៉ូ។ លោកវរសេនីយ៍ឯក មេបញ្ជាការរងកងរាជអាវុធហត្ថខេត្ត បានបន្ថែមថា ក្រោយក្រោយពីបានស្តាប់ចម្លើយជនសង្ស័យឈ្មោះ វើង វី បានសារភាពថាថ្នាំញៀន ដែលសមត្ថកិច្ចបានដកហូត គឺខ្លួនបានទិញពីមនុស្សម្នាក់ឈ្មោះ សល់ ប្រុស អាយុប្រហែលជាង ៣៤ឆ្នាំ រស់នៅម្តុំភូមិដំណាក់ត្រាច ឃុំទួលអំពិល ស្រុកបសេដ្ឋ ខេត្តកំពង់ស្ពឺ។
ដោយបានការអនុញ្ញាតពី លោកមេបញ្ជាការកងរាជអាវុធហត្ថខេត្តតាកែវ និងសម្របសម្រួលនីតិវិធី ឯកឧត្តម ឯក ឆេងហួត ព្រះរាជអាជ្ញាអមសាលាដំបូងខេត្ត នៅវេលាម៉ោង១៧និង១០នាទី ថ្ងៃទី១៤ ខែសីហា ឆ្នាំ២០២២ ទើបកំលាំងការិយាល័យប្រឆាំងគ្រឿងញៀនធ្វើការពន្លាតដែនសមត្ថកិច្ចពីខេត្តតាកែវ ទៅខេត្តកំពង់ស្ពឺ ដោយបានធ្វើការឃាត់ខ្លួនសង្ស័យបានចំនួន ០៤នាក់៖ ១/ ឈ្មោះ អ៊ី វុត្ថា ភេទប្រុស អាយុ ៣២ឆ្នាំ (ប្រើប្រាស់) រស់នៅភូមិដំណាក់ត្រាច ឃុំទួលអំពិល ស្រុកបសេដ្ឋ ខេត្តកំពង់ស្ពឺ, ២/ ឈ្មោះ ម៉ៅ រិទ្ធី ភេទប្រុស អាយុ ៣០ឆ្នាំ (ប្រើប្រាស់) រស់នៅភូមិដំណាក់ត្រាច ឃុំទួលអំពិល ស្រុកបសេដ្ឋ ខេត្តកំពង់ស្ពឺ, ៣/ ឈ្មោះ នាក់ វណ្ណៈ ភេទប្រុស អាយុ ៣៥ឆ្នាំ (ប្រើប្រាស់) រស់នៅភូមិដំណាក់ត្រាច ឃុំទួលអំពិល ស្រុកបសេដ្ឋ ខេត្តកំពង់ស្ពឺ, និងទី ៤/ ឈ្មោះ ចក់ លឹម ភេទប្រុស អាយុ ២៨ឆ្នាំ (ប្រើប្រាស់) រស់នៅភូមិស្រឡែង ឃុំទួលអំពិល ស្រុកបសេដ្ឋ ខេត្តកំពង់ស្ពឺ, ដោយឡែកជនសង្ស័យឈ្មោះ សល់ ភេទប្រុស អាយុ ៣៤ឆ្នាំ រស់នៅភូមិ ឃុំ កើតហេតុខាងលើ បានរត់គេចខ្លួន។
លោកវរសេនីយ៍ឯក ង៉ែត ចាន់ធី បានបញ្ជាក់ថា ប្រតិបត្តិការខាងលើនេះដែរ សមត្ថកិច្ចយើងបានធ្វើការដកហូតបានវត្ថុតាងមាន៖ សម្ភារៈសេពថ្នាំញៀនមួយចំនួន (ដបទឹកសុទ០២), ទូរស័ព្ទចំនួន ០៣ (អូប៉ូ១,មិនស្គាល់ម៉ាក០២)។ ក្រោយការឃាត់ខ្លួន ជនសង្ស័យទាំង ០៥នាក់ ត្រូវបានឃាត់នៅទីបញ្ជាការកងរាជអាវុធហត្ថខេត្ត ជាបណ្ដោះអាសន្នដើម្បីសាកសួរកសាងសំណុំរឿងបញ្ជូនទៅសាលាដំបូងខេត្តតាកែវ៕
