02-សីហា-2022 - ម៉ោង 03:40:PM
ភ្នំពេញ៖ បន្ទាប់ពីមានប្រតិកម្ម កក្រើកលើកទ្បើងនៅលើបណ្តាញសង្គមហ្វេសប៊ុក ពីសំណាក់មហាជន ដែលពាក់ព័ន្ធទៅនឹងការតម្រូវឲ្យអ្នកបើកបរយានយន្តទាំងអស់ត្រូវយកឯកសារ ច្បាប់ដើមដាក់តាមខ្លួន ដូចជាបណ្ណបើកបរបណ្ណសំគាល់យានយន្ត និងកន្ទុយឈៀកនោះ នៅព្រឹក ថ្ងៃទី ២ ខែសីហា ឆ្នាំ ២០២២ នេះ នាយកដ្ឋាននគរបាលចរាចរណ៍ និង សណ្ដាប់ ធ្នាប់ សាធារណៈ បានចេញមកបំភ្លឺបញ្ជាក់ដូច្នេះ។
គ្រប់អ្នកបើកបរទាំងអស់តម្រូវឲ្យមាន ឯកសារភ្ជាប់ពេលកំពុងធ្វើចរាចរណ៍ដូចជា៖
១- បណ្ណបើកបរ ( ច្បាប់ដើមហ្ស៊ីន )
២- បណ្ណសំគាល់យានយន្ត ( ច្បាប់ ចម្លង មានការ បញ្ជាក់ ត្រឹមត្រូវ " បញ្ជាក់ ពី អាជ្ញាធរ ខណ្ឌ ស្រុកក្រុង " )
៣- វិញ្ញាបនបត្រ ត្រួតពិនិត្យ លក្ខណៈ បច្ចេកទេសយានយន្ត ( ច្បាប់ ចម្លង មានការ បញ្ជាក់ ត្រឹមត្រូវ " បញ្ជាក់ ពីអាជ្ញាធរ ខណ្ឌ ស្រុកក្រុង " ) ។
ចំពោះចំងល់របស់មហាជនខាងលើនេះផងដែរ លោក គង់ វិមាន អ្នកនាំពាក្យ ក្រសួងសាធារណការ និង ដឹកជញ្ជូន ក៏បាន បំភ្លឺបន្ថែម ថា តាម គោលការណ៍ ច្បាប់ អ្នក បើកបរ យានយន្ត គ្រប់ប្រភេទត្រូវមាន ឯកសារ ច្បាប់ ដើមដាក់តាមខ្លួន ។ ប៉ុន្តែ ដោយមើលឃើញ ការ លំបាក របស់ បងប្អូន ប្រជាពលរដ្ឋ ដែល ទិញរថយន្ត បង់រំលោះ និង បងប្អូនដែលយក បណ្ណសំគាល់យានយន្ត ទៅដាក់បញ្ចាំ ក៏ដូចជា បុគ្គលិកក្រុមហ៊ុន ដឹកជញ្ជូន មន្ត្រីជំនាញ បាន ស្នើសុំ គោល ការណ៍ សម្រេចជាថ្មី ពី ថ្នាក់ ដឹកនាំ ក្រសួងសាធារណការ និង ដឹក ជញ្ជូន ដើម្បីជួយសម្រួល ដល់ការ លំបាក របស់បងប្អូនប្រជាពលរដ្ឋ ដោយតម្រូវអោយយកតែ បណ្ណបើកបរប៉ុណ្ណោះ ជាច្បាប់ដើម ។
ប៉ុន្តែដោយឡែក បណ្ណសំគាល់យានយន្ត និង វិញ្ញាបនបត្រ ត្រួតពិនិត្យលក្ខណៈ បច្ចេកទេស យានយន្តវិញនោះ គឺអាចឲ្យប្រើប្រាស់ ឯកសារថតចម្លងបាន តែតម្រូវឲ្យមានការបញ្ជាក់ទទួលស្គាល់ពីអាជ្ញាធរ ក្រុង / ខណ្ឌ / ស្រុករបស់ខ្លួនរស់នៅបានហើយ ៕
