30-វិច្ឆិកា-2021 - ម៉ោង 02:10:PM
តាកែវ៖ ស្នងការនគរបាលខេត្តតាកែវ លោកឧត្តមសេនីយ៍ទោ ឈាង ផាន់ណារ៉ា ដែលទើបតែប្រកាសឡើងកាន់តំណាងជាស្នងការថ្មី បានធ្វើការដាស់តឿនទៅដល់មន្រ្តីនគរបាលផែនចរាចរណ៍ទាំងអស់ ត្រូវប្រកាន់ភ្ជាប់ក្រមសីលធម៌ក្នុងនាមជាកងកម្លាំង និងត្រូវមានអាកប្បកិរិយាល្អសមរម្យចំពោះបងប្អូនប្រជាពលរដ្ឋ ។
ថ្លែងនៅចំពោះមុខលោកអធិការនគរបាលក្រុងស្រុក និងនាយការិយាល័យ ចំណុះឱ្យស្នងការ ដ្ឋាននគបាលខេត្តតាកែវ នៅក្នុងកិច្ចប្រជុំបូកសរុបសភាពការណ៍ និងលទ្ធផលកិច្ចសហប្រតិបត្តិការរក្សាសន្តិសុខសណ្ដាប់ធ្នាប់សង្គម ប្រចាំខែវិច្ឆិកា និងលើកទិសដៅខែធ្នូ ឆ្នាំ២០២១ កាលពីថ្ងៃទី ២៩ ខែវិច្ឆិកា ម្សិលមិញនេះ លោកឧត្តមសេនីយ៍ទោ ឈាង ផាន់ណារ៉ា ស្នងការនគរបាលខេត្ត បានមានប្រសាសន៍ បន្តទៀតថា ការគោរព និងមានអាកប្បកិរិយាល្អសមរម្យដាក់បងប្អូនប្រជាពលរដ្ឋ ដែលពួកគាត់ប្រើប្រាស់ដងផ្លូវនានា គឺជាការស្រឡាញ់ចូលចិត្ត និងឱ្យតម្លៃពីសំណាក់មហាជនទូទៅចំពោះកងកម្លាំងនគរបាលចរាចរណ៍របស់យើង ។
លោកឧត្តមសេនីយ៍ទោស្នងការ បន្ថែមទៀតថា ទោះក្នុងស្ថានភាពដែលបងប្អូនប្រជាពលរដ្ឋ របស់យើងជិះម៉ូតូឬបើករថយន្តខុសយ៉ាងណាក៏ដោយ ក្នុងនាមជាកងកម្លាំងចរាចរណ៍ យើងត្រូវមានកាយវិការសមរម្យ និងគោរពពួកគាត់ ហើយធ្វើការអប់រំណែនាំដល់គាត់ និងពន្យល់គាត់ឱ្យចូលរួមគោរពច្បាប់ចរាចរណ៍ទាំងអស់គ្នា ដើម្បីការពារអាយុជីវិតពួកគាត់ផង និងកុំឱ្យខាតបង់ទ្រព្យសម្បត្តិរបស់ពួកគាត់ផងដែរ។
លោកស្នងការ ឈាង ផាន់ណារ៉ា ក៏បានក្រើនរំលឹកផងដែរចំពោះមន្រ្តីនគរបាលចរាចរណ៍ ដែលដាក់គោលដៅទាំងអស់នៅក្នុងភូមិសាស្រ្តខេត្ត ត្រូវកែប្រែទម្លាប់មិនល្អ ឬប្រើពាក្យសំដីមិនសមរម្យ និងកាយវិការមិនគប្បីដាក់បងប្អូនប្រជាពលរដ្ឋ សូមកែប្រែឡើងវិញ ដើម្បីឱ្យបងប្អូនប្រជាពលរដ្ឋគោរពស្រឡាញ់យើង ហើយប្រសិនបើនៅតែមិនកែប្រែទម្លាប់មិនល្អនេះទេ យើងនឹងអនុវត្តវិន័យរបស់កងកម្លាំងជាក់ជាពុំខាន ៕