26-វិច្ឆិកា-2021 - ម៉ោង 02:14:PM
តាកែវ៖ លោក អ៊ូច ភា អភិបាលខេត្ត និងជាប្រធានគណៈបញ្ជាការឯកភាពខេត្តតាកែវ បានធ្វើការណែនាំទៅដល់មន្រ្តីសមត្ថកិច្ចទាំងអស់ដែលជាអ្នកអនុវត្តច្បាប់ សូមកុំពាក់ព័ន្ធឱ្យសោះចំពោះករណីគ្រឿងញៀននេះ ប្រសិនបើពាក់ព័ន្ធត្រូវទទួលខុសត្រូវចំពោះមុខច្បាប់។
ថ្លែងនៅក្នុងកិច្ចប្រជុំគណៈបញ្ជាការឯកភាពរដ្ឋបាលខេត្ត នៅព្រឹកថ្ងៃសុក្រ ទី២៦ ខែវិច្ឆិកា ឆ្នាំ២០២១នេះ លោក អ៊ូច ភា អភិបាលខេត្តតាកែវ បានមានប្រសាសន៍បន្តថា បញ្ហាគ្រឿងញៀនវានៅតែបញ្ហារសើបមួយនិងកើតមានឡើងតាំងពីក្រុងស្រុករហូតដល់ភូមិឃុំ ដែលទាមទារឱ្យមានការប្ដេជ្ញាចិត្តខ្ពស់ពីសំណាក់សមត្ថកិច្ចនិងអាជ្ញាធរពាក់ព័ន្ធក្នុងការចូលរួមទប់ស្កាត់ និងបង្រ្កាបយ៉ាងសកម្ម ទើបយើងអាចជោគជ័យទៅបាន។
ឯកឧត្តមអភិបាលខេត្ត បន្ថែមទៀតថា សូមលោកស្នងការថ្មី លោកមេបញ្ជាការកងរាជអាវុធ ត្រូវធ្វើការណែនាំបន្ថែមទៀត ក៏ដូចជាពង្រឹងឱ្យបានម៉ត់ចត់ចំពោះកងកម្លាំងសមត្ថកិច្ចទាំងអស់ សូមកុំពាក់ព័ន្ធនឹងគ្រឿងញៀន ឱ្យសោះ ប្រសិនបើសមត្ថកិច្ចមានការពាកព័ន្ធនឹងគ្រឿងញៀន នោះការបង្រ្កាបរបស់យើងនឹងមិនអស់នោះទេ ហើយករណីគ្រឿងញៀននេះដែរ កន្លងមកធ្លាប់មានករណីមន្រ្តីអាវុធហត្ថខេត្តជាប់ពាក់ព័ន្ធនឹងករណីជួញដូរគ្រឿងញៀននេះ ដូច្នោះសូមលោកស្នងការ លោកមេបញ្ជាការកងរាជអាវុធហត្ថខេត្ត ត្រូវពង្រឹងចំពោះមន្រ្តីរបស់ខ្លួនឱ្យបាន ។
លោក អ៊ូច ភា បញ្ជាក់ទៀតថា គ្រឿងញៀននេះវាបានធ្វើឱ្យប៉ះពាល់ដល់សង្គមយ៉ាងធ្ងន់ធ្ងរជាពិសេសចំពោះយុវជនដែលប្រើប្រាស់គ្រឿងញៀននឹងត្រូវបាត់បង់អនាគត់ទាំងស្រុង ដូច្នោះសូម កងកម្លាំងសមត្ថកិច្ច ត្រូវយកចឹត្តទុកដាក់បង្រ្កាបបញ្ហាការចែកចាយ ជួញដូរ គ្រឿងញៀននេះអោយបានខ្លាំងក្លា នៅគ្រប់មូលដ្ឋានទូទាំងខេត្តរបស់យើង។
លោក អ៊ូច ភា បានថ្លែងបន្តថា បើយើងទប់ស្កាត់បញ្ហាគ្រឿងញៀននេះបានវានិងធ្វើឲ្យភូមិឃុំរបស់យើងមានសុវត្តិភាព គ្មានការលួចប្លន់ គ្មានក្មេងទំនើង បងប្អូនប្រជាពលរដ្ឋរស់នៅដោយគ្មានការភ័យខ្លាច ហើយវាក៍ជួយបង្កើនដល់ការផ្ដល់ជំនឿទុកចិត្តរបស់បងប្អូនប្រជាពលរដ្ឋ មកលើសមត្ថកិច្ចក៍ដូចជាអាជ្ញាធរផងដែរ។
ជាមួយគ្នានេះដែរ លោកអភិបាលខេត្តតាកែវ អ៊ូច ភា ក៏បានណែនាំបន្ថែមទៀតទៅដល់លោកអភិបាលក្រុងស្រុកទាំងអស់ សូមយកចិត្តទុកដាក់ចំពោះមនុស្សចាស់ដែលគ្មានទីពឹង ដោយចុះស្រាវជ្រាវ និងស្រង់ស្ថិតិពួកគាត់ឱ្យបានច្បាស់លាស់ ដើម្បីងាយស្រួលសម្រាប់ជួយដល់ពួកគាត់ និងចែកអាវរងារក៏ដូចជាស្បៀងអាហារមួយចំនួនទៀត ព្រោះចាប់ពីសប្តាហ៍ទី១នៃខែធ្នូរហូតដល់ខែកុម្ភៈឆ្នាំ២០២២ អាកាសធាតុនឹងចុះត្រជាក់ខ្លាំង ដូច្នោះយើងត្រូវតែគិតគូរយកចិត្តទុកដាក់ដល់ពួកគាត់ តាមអនុសាសន៍ដ៏ខ្ពង់ខ្ពស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ៕
