19-តុលា-2021 - ម៉ោង 07:59:PM
តាកែវ៖ អាជ្ញាធរខេត្តតាកែវ ដឹកនាំដោយលោក ខាន់ សុខា អភិបាលរងខេត្ត រួមនឹងមន្រ្តីជំនាញ និងកម្លាំងសមត្ថកិច្ចចំរុះ បានចុះរុះរើខ្ទមតូចៗរបស់បងប្អូនប្រជាពលរដ្ឋ ដែលសង់នៅលើដីរបស់រដ្ឋ ដោយខុសច្បាប់ចំនួន៤ទីតាំង ដែលស្ថិតនៅឃុំត្រពាំងក្រញូង ស្រុកត្រាំកក់ កាលពីព្រឹកថ្ងៃអង្គារ ទី ១៩ ខែតុលា ឆ្នាំ២០២១ ។
លោក ខាន់ សុខា អភិបាលរងខេត្តតាកែវ ដែលដឹកនាំកម្លាំងសមត្ថកិច្ចចំរុះ បានបញ្ជាក់ថា ទីតាំងទាំងនេះ បានសាង សង់ជាខ្ទមតូចៗ នៅលើដីរដ្ឋដោយគ្មានការអនុញ្ញាតពីអាជ្ញាធរមូលដ្ឋាន ហើយក្នុងនោះដែរ កន្លងមកអាជ្ញាធរបានធ្វើការណែនាំនិងហាមឃាត់ពួកគាត់ មិនឱ្យមានការសាងសង់ផ្ទះ ឬខ្ទមអ្វីដែរ ព្រោះការសាងសង់នេះវាខុសនឹងច្បាប់ ប៉ុន្តែពួកគាត់មិនព្រមស្តាប់តាមការណែនាំរបស់អាជ្ញាធរដោយបន្តសាងសង់ដដែល ដូច្នោនៅព្រឹកថ្ងៃនេះ អាជ្ញាធរបានសម្រេចបំផ្លាញ់ចោលនៅទីតាំងសាងសង់ផ្ទះនិងខ្ទមតូចៗនេះចោលតែម្តង ។
ជាមួយគ្នានេះដែរ លោក ខាន់ សុខា ក៏បានធ្វើការអំពាវនាវទៅដល់បងប្អូនប្រជាពលរដ្ឋទាំងអស់ សូមបញ្ឈប់ការកាន់ទន្ទ្រានដីព្រៃភ្នំដោយខុសច្បាប់បន្តទៀត យកមកធ្វើជាកម្មសិទ្ធផ្ទាល់ខ្លួន ព្រោះទង្វើនេះជាអំពើខុសច្បាប់ ហើយក្នុងនោះដែរ សូមអាជ្ញាធរមូលដ្ឋានត្រូវបន្តតាមដាន និងត្រួតពិនិត្យនៅទីតាំងដីព្រៃនេះឱ្យបានជាប់ជាប្រចាំ ម្យ៉ាងវិញទៀតក៏ត្រូវអប់រំណែនាំដល់ប្រជាពលរដ្ឋឱ្យយល់ដឹងអំពី ផលលំបាកនៃការកាន់កាប់ឬកាន់ទន្ទ្រានយកដីរបស់រដ្ឋមកធ្វើជាកម្មសិទ្ធ ៕
