19-តុលា-2021 - ម៉ោង 07:53:PM
តាកែវ៖ អាកុលក្លែងក្លាយប្រមាណ១៦៨០០គីឡូក្រាម រួមនឹងទំនិញខូចគុណភាពជាច្រើនមុខចំនួន១៥០គីឡូក្រាម ត្រូវបានមន្រ្តីសាខាការពារអ្នកប្រើប្រាស់កិច្ចការប្រកួតប្រជែង និងបង្រ្កាបទំនិញក្លែងក្លាយ បានធ្វើការចុកបំផ្លាញ និង ដុតបំផ្លាញចោលនៅអាល់កុលក្លែងក្លាយ និងទំនិញខូចគុណភាព ហួសការបរិច្ឆេទប្រើប្រាស់ ដែលនាំឲ្យប៉ះពាល់សុខភាព អ្នកប្រើប្រាស់នាព្រឹកថ្ងៃពុធ ទី ១៨ ខែតុលា ឆ្នាំ២០២១នេះ ។
លោក លី សេរីសម្បត្តិ ប្រធានសាខាការពារអ្នកប្រើប្រាស់កិច្ចការប្រកួតប្រជែង និងបង្រ្កាបទំនិញក្លែងក្លាយខេត្តតាកែវ បានថ្លែងឲ្យដឹងថា អាកុលក្លែងក្លាយ ក៏ដូចជាទំនិញខូចគុណភាពជាច្រើនមុខទៀតដែលមន្រ្តីជំនាញបានធ្វើ ត្តេស៍ និងរកឃើញថា គ្មានគុណភាព និងក្លែងក្លាយដែលនាំឱ្យខូចសុខភាពដល់បងប្អូនអ្នកប្រើប្រាស់ ត្រូវបានយក ហូតពីតាមទីផ្សារមួយចំនួន ក្នុងនោះជំនាញបានរកឃើញអាល់កុលក្លែងក្លាយចំនួន ១៣ ប៊ីដុង និង៣០យួរ ស្មើនិង ១៦៨០០ គីទ្បូក្រាម រួមនិងទំនិញខូចគុណភាព ហួសកាលបរិច្ឆេទប្រើប្រាស់១៥០គីទ្បូក្រាម ដែលសរុបស្មើនិង ១៦៩៥០គីទ្បូក្រាម ។
លោកប្រធានសាខា ក.ប.ប. ក៏បានបញ្ជាក់ផងដែរថា មន្រ្តីជំនាញកបប និងបន្តខិតខំចុះត្រួត ពិនិត្យទំនិញដែលដាក់តាំងលក់នៅតាមទីផ្សារនានាទូទាំងខេត្ត ដើម្បីរកមើលគ្រឿងកំប៉ុងណាដែលហួសកាលបរិច្ឆេទប្រើប្រាស់ និងមានសភាពចាស់ច្រេះហើយនោះ លោកក៏បានធ្វើការណែនាំទៅដល់ក្រុមអាជីវករ ឲ្យរៀបចំទុកដាក់របស់លក់ដូរ ធ្វើយ៉ាងម៉េចលក់ឲ្យមានស្តង់ដារបច្ចេកទេសត្រឹមត្រូវ ជៀសវាងដាក់លក់ត្រូវថ្ងៃ ដែលធ្វើឲ្យទំនិញនោះឆាប់ខូចគុណភាព ហើយគ្រឿងកំប៉ុងណាដែលមានសភាពមិនល្អ ឬហួស កាលបរិច្ឆេទ សូមកុំដាក់លក់ជូនអតិថិជនឲ្យសោះ ត្រូវយកទុកដាច់ដោយឡែកពីគ្នា ឬយកទៅបំផ្លាញចោលដោយខ្លួនឯងតែម្តងទៅ ពិសេសគឺនៅក្នុងបរិបទកូវីដ១៩យើងត្រូវតែលក់របស់សុទ្ធមិនមក្លែងក្លាយ ព្រោះពេលនេះប្រជាពលរដ្ឋគាត់កំពុងតែត្រូវការអាកុលសម្រាប់ការពារខ្លួនពីជំងឺកូវីដ១៩។
លោកប្រធានសាខាកាំកុងត្រូល លី សេរីសម្បត្តិ ក៏បានបញ្ជាក់ដឹងថា ថ្ងៃនេះមន្ត្រីជំនាញរបស់លោក រួមជាមួយមន្រ្តីនៃមន្ទីរពាក់ព័ន្ធជាច្រើនរូបបានទៀត បានរៀបចំធ្វើការដុតកំទិចចោលនូវអាល់កុលក្លែងក្លាយ និងទំនិញខូចគុណភាព ហួសកាលបរិច្ឆេទក្នុងការប្រើប្រាស់សរុបប្រមាណជា ១៦៩៥០ គីទ្បូក្រាម នៅទីលានចាក់សម្រាមមួយកន្លែង ឆ្ងាយ ពីផ្ទះបងប្អូនប្រជាពលរដ្ឋ ដើម្បីកុំឲ្យមានការប៉ះពាល់ដល់សុខភាពពួកគាត់ផងដែរ ។
ហើយជាចុងក្រោយលោកប្រធានសាខា ក៏សូមអំពាវនាវទៅដល់ បងប្អូនប្រជាពលរដ្ឋ សូមទិញទំនិញ និងចំណីអាហារណា ដែលមានសុវត្ថិភាពខ្ពស់ និងសូមពិនិត្យុមើលកាលបរិច្ឆេទប្រើប្រាស់ឲ្យបានច្បាស់លាស់ និងមានស្តង់ដា រអនាម័យត្រឹមត្រូវ ដើម្បីចូលរួមលើកកម្ពស់សុខមាលភាពសាធារណៈ ៕