12-តុលា-2021 - ម៉ោង 11:02:AM
កំពត៖ លោក ជាវ តាយ សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានគណបក្សប្រជា ជនខេត្តកំពត អញ្ជើញចុះសួរសុខទុក្ខនិង នាំយកអំណោយថវិការបស់ ឯកឧត្តម បណ្ឌិត ហ៊ុន ម៉ាណែត ប្រធានយុវជនគណបក្សប្រជាជនកម្ពុជា ជូនក្រុមការងារយុវជនគណបក្សស្រុកបន្ទាយមាស ដើម្បីសាងសង់ស្នាក់ការយុវជនគណបក្ស កាលពីព្រឹកថ្ងៃទី ១០ ខែតុលា ឆ្នាំ២០២១ ។
នាឱកាសនោះផងដែរ លោក ក៏បានជំរុញឱ្យយុវជនបក្សទាំងអស់ ត្រូវខិតខំជំរុញការអភិវឌ្ឍន៍មូលដ្ឋាន ទំនាក់ទំនងឲ្យបានល្អជាមួយអាជ្ញាធរនិងប្រជាពលរដ្ឋ បន្តការកសាងកម្លាំងយុវជនគណបក្សឱ្យបានច្រើន ក្នុងគោលដៅរួមចំណែក ជ្រោងខ្ពស់គណបក្សប្រជាជនកម្ពុជា ដើម្បីចូលរួមចំណែកជួយសង្គមជាតិកម្ពុជាយើងឲ្យបានកាន់តែរីកចំរើនបន្ថែមទៀត ។
លោក ជាវ តាយ ក៏បាន ក្រើនរំលឹកផ្ដាំផ្ញើដល់ក្រុមការងារយុវជនគណបក្សទាំងអស់ត្រូវបន្តខិតខំយកចិត្តទុកដាក់អនុវត្តបន្ថែមទៀតដើម្បី សម្រេចឲ្យបានតាមគោលដៅរបស់គណបក្សប្រជាជន។ ជាពិសេស ថ្នាក់ដឹកនាំ និងសមាជិកក្រុមការងារយុវជនគណបក្សទាំងអស់ ត្រូវគោរពនឹងអនុវត្តតាមគោលការណ៍បក្ស គោលនយោបាយផ្សេងៗរបស់គណបក្សប្រជាជនកម្ពុជា ក្រោមការដឹកនាំរបស់សម្ដេចតេជោហ៊ុនសែនប្រធានគណបក្សប្រជាជនកម្ពុជា ដែលបានដាក់ចេញ ឲ្យបានល្អ និងត្រូវចូលរួម សហការជាមួយថ្នាក់ដឹកនាំគណបក្ស អាជ្ញាធរគ្រប់លំដាប់ថ្នាក់ក្នុងមូលដ្ឋាន ឲ្យបានល្អ ដើម្បីស្វែងយល់ពីទុក្ខលំបាក តម្រូវ ការ របស់ប្រជា ពលរដ្ឋ នឹងត្រូវជំរុញការបំផុសស្មារតីប្រជាពលរដ្ឋឱ្យមានជំនឿជឿជាក់មកលើការដឹកនាំដ៏ត្រឹមត្រូវ និងមានការគាំទ្រពីសំណាក់ប្រជាពលរដ្ឋមកលើគណបក្សប្រជាជនកម្ពុជា ដើម្បីឈានទៅយកជ័យជម្នះក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ នាឆ្នាំ២០២២ និងបោះឆ្នោតជ្រើសតាំងតំណាងរាស្ត្រឆ្នាំ២០២៣ ខាងមុខនេះ។
ជាគ្នានោះដែរ លោកប្រធានគណបក្សខេត្ត ក៏បានកោត សរសើរដល់ថ្នាក់ដឹកនាំ សមាជិកក្រុមការងារយុវជនគណបក្សប្រជាជន ទាំងអស់ដែលកន្លងមកបានជួយ ដោះស្រាយការទុក្ខលំបាករបស់ប្រជាពលរដ្ឋក្នុងមូលដ្ឋានបានល្អប្រសើរ។
ជាចុងបញ្ចប់ លោក ជាវ តាយ ប្រធានគណបក្សប្រជាជនខេត្តកំពត ក៏បាននាំយកនូវថវិកា លោក ហ៊ុន ម៉ាណែត ប្រធានយុវជនគណបក្សប្រជាជនកម្ពុជា នូវថវិកាចំនួន ៣ម៉ឺនដុល្លារសម្រាប់កសាងស្នាក់ការយុវជនគណបក្សស្រុកបន្ទាយមាស និងជូនថវិកាសរុបចំនួន ៦លានរៀលបន្ថែមទៀតដើម្បីឧបត្ថម្ភជូនដល់សមាជិក ក្រុមការងារយុវជនគណបក្សស្រុកបន្ទាយមាស ចំនួន ៣០០នាក់ ក្នុងម្នាក់ៗថវិកា ២ម៉ឺនរៀលផងដែរ៕