15-កញ្ជា-2021 - ម៉ោង 03:51:PM
កំពង់ស្ពឺ៖ អ្នកតំណាងរាស្រ្តមណ្ឌលកំពង់ស្ពឺ លោក ហ៊ុន ម៉ានី ព្រឹកថ្ងៃទី១៥ ខែកញ្ញា ឆ្នាំ២០២១នេះ បាននាំយកអំណោយផ្តល់ជូនកងកម្លាំងកំពុងឈរជើងនៅខេត្តកំពង់ស្ពឺរួមមាន៖ ស្នងការដ្ឋាននគរបាលខេត្ត បញ្ជាការដ្ឋានកងរាជអាវុធហត្ថខេត្ត តំបន់ប្រតិបត្តិការសឹងរងខេត្ត និងបញ្ជាការដ្ឋានការពារកោះឆ្នេរ ដែលរៀបចំទ្បើងនៅបរិវេណសាលាខេត្តកំពង់ស្ពឺ។
នាឱកាសនោះផងដែរ លោក ហ៊ុន ម៉ានី ក៏បានថ្លែងអំណរគុណចំពោះកងកម្លាំងទាំងអស់ នៃខេត្តកំពង់ស្ពឺ ចំពោះការលះបង់ និងកិច្ចខិតខំប្រឹងប្រែងក្នុងការបំពេញភារកិច្ចការពារជាតិ ប្រជាជន រក្សាសន្តិសុខ និងសណ្តាប់ធ្នាប់ ជួយ សង្រ្គោះជីវិតពីគ្រោះធម្មជាតិនានាកន្លងមក មិនថាក្នុងដំណាក់កាលនៃការរីករាលដាលនៃជំងឺកូវីដ១៩ គឺកងកម្លាំងទាំងអស់មានបេសកកម្មយ៉ាងសំខាន់សម្រាប់ប្រទេសជាតិ។
ជាមួយគ្នានេះ លោកក៏បាននាំមកនូវសម្ភារវេជ្ជសាស្រ្តរួមមាន៖ ម៉ាស៊ីនបង្កើតអុកស៊ីហ្សែន អាល់កុល និងទឹកសុទ្ធ សម្រាប់ប្រើប្រាស់ក្នុងការព្យាបាលអ្នកជំងឺកូវីដ១៩ ជូនមន្ទីរសុខាភិបាលផងដែរ។
ជំនួសមុខឱ្យកងកម្លាំងប្រដាប់អាវុធ និងមន្ទីរសុខាភិបាល ដែលទទួលបានអំណោយក្នុងឱកាសនោះ លោក វ៉ី សំណាង អភិបាលខេត្ត បានថ្លែងអំណរគុណដល់អ្នកតំណាងរាស្រ្តទាំងអស់ ដែលតែងតែបានផ្តល់ជំនួយ ជាបន្តបន្ទាប់ដល់បងប្អូនជាមន្រ្តីរាជការ អាជ្ញាធរដែនដី កងកម្លាំងប្រដាប់អាវុធ ក្រុមគ្រូពេទ្យ និងប្រជាពលរដ្ឋរងគ្រោះមិនមានដាច់។
ជានិច្ចជាកាល តំណាងរាស្រ្តខេត្តកំពង់ស្ពឺ តែងគិតគូរពីសុខទុក្ខប្រជាពលរដ្ឋក្នុងខេត្តកំពង់ស្ពឺនិយាយជារួម និងដល់កងកម្លាំង ក្រុមគ្រូពេទ្យនិយាយដោយឡែកដែលកំពុងឈរជើងប្រចាំការ ប្រយុទ្ធនឹងជំងឺឆ្លងកាចសាហាវកូវីដ ១៩។ បើទោះជាស្ថានភាពជំងឺកូវីដ១៩ នៅក្នុងខេត្តកំពង់ស្ពឺ កំពុងស្ថិតក្នុងកម្រិតអាចគ្រប់គ្រងបាន តែក្រុមការងារទាំងអស់នៅបន្តការយកចិត្តទុកដាក់ និងប្រុងប្រយ័ត្នខ្ពស់ដោយបន្តតាមដានជាប់ជាប្រចាំ។
អំណោយដែលត្រូវផ្តល់ជូនមាន ស្នងការនគរបាលខេត្ត បញ្ជាការដ្ឋានកងរាជអាវុធហត្ថខេត្ត តំបន់ប្រតិបត្តិការសឹករងខេត្ត ក្នុងមួយអង្គភាពទទួលបាន៖ ថវិកាចំនួន៥លានរៀល, អង្ករចំនួន៥តោន, ទឹកបរិសុទ្ធចំនួន២០០កេស, ត្រីខចំនួន១០កេស, មីចំនួន១០កេសធំ, ម៉ាស់ចំនួន១០,០០០ម៉ាស់ និងបានផ្តល់ជូនមន្ទីរសុខាភិបាលមាន ម៉ាស៉ីនអុកស៊ីហ្សែនចំនួន២គ្រឿង, អាកុលចំនួន៥០០លីត្រ និងទឹកបរិសុទ្ធចំនួន២០០កេស៕