10-កញ្ជា-2021 - ម៉ោង 04:45:PM
តាកែវ៖ បន្ទាប់ពីបានមើលឃើញទំនប់ត្នោតទេរ ដែលស្ថិតនៅភូមិត្នោតទេរ ឃុំទ្រា ស្រុកសំរោង គ្មានដើមត្នោតដុះនៅទីនោះ លោក កេត ម៉ៅ អភិបាលស្រុកសំរោង នៅព្រឹកថ្ងៃ សុក្រ ទី ១០ ខែកញ្ញា ឆ្នាំ២០២១នេះ បានដឹកនាំមន្ត្រីថ្នាក់ស្រុក ថ្នាក់ឃុំ និងក្រុមយុវជន ចុះដាំគ្រាប់ត្នោតតាមជើងទំនប់ចំនួន ១,៥០០គ្រាប់ ដែលដើមត្នោតនេះគឺជាកេរ្តិ៍ដំណែលពីដូនតា។
លោកអភិបាលស្រុកសំរោង បានថ្លែងអោយដឹងថា ការដាំដើមត្នោតនៅពេលនេះគឺដើម្បី ទុកអោយកូន ខ្មែរជំនាន់ក្រោយបានឃើញនិងបានស្គាល់ នៅដើមឈើមួយប្រភេទដែលផ្តល់ អត្ថប្រយោជន៍យ៉ាងច្រើន ម្យ៉ាងទៀតនៅទំនប់ត្នោតទេរនេះ មានបងប្អូនប្រជាពលរដ្ឋជាច្រើនបានធ្វើដំណើរ មកលេងកម្សាន្ត ជាពិសេសនៅរដូវបុណ្យទាន ដូច្នោះការដាំដើមត្នោតនៅទីនេះ វានិងលើកសម្រស់តំបន់នេះ អោយកាន់ តែមានភាពស្រស់បំព្រងមួយកម្រឹតថែមទៀតជាក់ជាពុំខាន។
ឆ្លៀតក្នុងឱកាសនោះផងដែរ លោក កេត ម៉ៅ ក៏បានធ្វើការអំពាវនាវ សូមបងប្អូនប្រជាពលរដ្ឋ ទាំងអស់គ្នាចូលរួមដាំនិងថែរក្សាដើមត្នោតដើម្បីបង្ហាញពីការស្រឡាញ់ នូវដួងព្រលឹងជាតិនិងអត្តសញ្ញា ណជាតិរបស់ខ្មែរយើងឲ្យបានគ្រប់ៗគ្នា ៕