10-មិថុនា-2021 - ម៉ោង 03:29:PM
អន្តរជាតិ៖ តាមចុះផ្សាយរបស់ទីភ្នាក់ងារសារព័ត៍មានស៊ីនហួរ នៅថ្ងៃព្រហស្បតិ៍ ទី១០ ខែមិថុនា ឆ្នាំ២០២១នេះ មានករណីធ្លាក់យន្តហោះមួយ នៅតំបន់ភាគកណ្តាលនៃប្រទេសមីយ៉ាន់ម៉ា
និងបានផ្តាច់ជីវិតមនុស្ស ១២នាក់ និង ០២នាក់ទៀតដែលរបួស ត្រូវបានបញ្ជូនទៅកាន់មន្ទីរពេទ្យយោធា ដែលស្ថិតនៅជិតនោះ។
យន្តហោះយោធាធុនមធ្យមស៊េរីចាស់ខាងលើនេះ បានធ្វើដំណើរពីរដ្ឋធានីណៃពិដោ សំដៅទៅកាន់ទីក្រុង ព្យីន អូ ល្វីន (Pyin Oo Lwin) ហើយនៅពេលទៅដល់កន្លែងចុះចត វាបានបន្ទាបខ្លួនបន្តិចម្តងៗ ប៉ុន្តែពេលនៅសល់ត្រឹមតែ ៣០០ម៉ែត្រទៀតប៉ុណ្ណោះ ក៏បានបាត់បង់ភាពម្ចាស់ការ ធ្លាក់ចុះមកតែម្តង។
តាមការផ្សាយរបស់ទូរទស្សន៍រដ្ឋមីយ៉ាន់ម៉ាឲ្យដឹងថា យន្តហោះខាងលើនេះបានដឹក កងកម្លាំងយោធាចំនួន ០៦នាក់ និងព្រះសង្ឃ ដើម្បីទៅចូលរួមក្នុងពិធីបុណ្យសាសនាមួយ ។ សម្រាប់អ្នកនៅរស់ទាំងពីរនាក់នោះ គឺជាអាកាសយានិកម្នាក់ និងអ្នកដំណើរម្នាក់ទៀត។ មូលហេតុនៃការធ្លាក់ អាចបង្កឡើងដោយកត្តាអាកាសធាតុ៕