10-មិថុនា-2021 - ម៉ោង 03:19:PM
ភ្នំពេញ៖ រដ្ឋមន្រ្តីក្រសួងកសិកម្ម លោក វេង សាខុន លើកទឹកចិត្តឲ្យម្ចាស់សិដ្ឋានចិញ្ចឹមត្រី Cambodia Fresh Farm ក្នុងភូមិថ្នល់បត់ ឃុំកោះចិន ស្រុកពញាឮ ខេត្តកណ្តកល បង្កើនការចិញ្ចឹមត្រីបន្ថែមទៀត ទាន់ឱកាសមាសមកដល់ ដើម្បីផ្គត់ផ្គង់ត្រីស្រស់ សម្រាប់ទីផ្សារក្នុងស្រុក។
ព្រឹកថ្ងៃទី១០ ខែមិថុនា ឆ្នាំ២០២១ លោក វេង សាខុន រដ្ឋមន្រ្តីក្រសួងកសិកម្មបានថ្លែងថា «លោកគាំទ្រ និងលើកទឹកចិត្តឲ្យកសិដ្ឋាន ត្រូវបន្តរក្សា ខិតខំពង្រឹង និងពង្រីកផលិតកម្ម ចិញ្ចឹមត្រីបន្ថែម ទាន់ឱកាសមាសមកដល់ ដោយត្រូវសហការជាមួយ រដ្ឋបាលជលផលអនុវត្ត បច្ចេកទេសឲ្យបានត្រឹមត្រូវ ចងក្រងបណ្តុំផលិតស្វែងរកដៃគូផលិត ភ្ជាប់បណ្តាញទីផ្សារ សម្រាប់ការផ្គត់ផ្គង់ ហើយត្រូវបង្កើនការកែច្នៃផលត្រីស្រស់ឲ្យបានច្រើន សម្រាប់ទីផ្សារក្នុង ស្រុក ដើម្បីបង្កើនតម្លៃបន្ថែម និងបង្កើតការងារ»។
លោកបន្ដថា ក្រសួងមានរដ្ឋបាលជលផលជាសេនាធិការ រង់ចាំផ្តល់កិច្ចសហការទាំង បច្ចេកទេស និងច្បាប់ ដើម្បីទទួលបានប្រយោជន៍រួម គឺនិរន្តរភាព នៃការផ្គត់ផ្គង់សមស្រប តាមតម្រូវការ និងឈានទៅធ្វើការ នាំចេញស្របតាមស្តង់ដាទីផ្សារជប៉ុន នាពេលអនាគត់ផង ដែរ៕